Лайихлу я
И йикъара Дагъустандин меркезда сиясатдин ва медениятдин рекьяй лишанлу са жерге мярекатар кьиле фена. Анра иштиракай ксари Дагъустандин халкьдин шаир Расул Гьамзатован ва хейлин йисара Дагъларин уьлкведиз регьбервал гайи Мегьамедали Магьамедован гуьмбетрал цуьквер эцигна, абурун экуь къаматар рикIел хкана. Мугьманрин арада Россиядин жуьреба-жуьре регионрай атанвайбурни авай.
И вакъиайрин шагьид хьайи зи рикIел чи машгьур ватанэгьли, Дагъустандин кьегьал хва, Ватандин ЧIехи дяведин цIаяра душмандихъ галаз вичин хайи кьуд стхани галаз иштиракай, хур медалривни орденрив ацIана, Гъалибвал гваз хтай Шагьабас Исмаилов хтана. Махачкъалада дяведилай кьулухъ яргъал йисара республикадин гьукумдин органра жавабдар къуллугъар авур адаз, вучиз ятIани, гуьмбет эцигдай са чIиб чка гьатнач.
Дагъларин уьлкведа яшайишдин жуьреба-жуьре хилера чIехи агалкьунар къазанмишай, намуслувилелди халкьдиз къуллугъ авуналди тарихда чпин тIвар эбеди авунвай кьегьал рухваярни рушар тIимил авач. Абурун арада бинеяр Ахцегь райондай тир Шагьабас Исмаилован тIвар хкат хьана аквазва. Чи халкьдин вилик-кьилик квай векилри, мумкинвилер авай жумарт меценатри и викIегь дагъвидиз Махачкъалада, белки са гуьмбет эцигин. И кIвалах кьилиз акъудиз хьанайтIа, кутугай кар жедай.
Шагьабас Исмаиловахъ хайи республикадин вилик гзаф лайихлувилер ава. Адан уьмуьрдикай, дяведин ва кIвалахдин рекьикай «Лезги газетдиз» идалай вилик са шумуд сеферда чIехи макъалаяр акъатна. Гьавиляй абур мад сеферда эзбер авунин игьтияж авач. Зи макьсад адан экуь къамат эбеди авунал чи халкьдин жавабдар къуллугъчийрин фикир желб авун я.
Бикеханум Алибегова