«Лезги газетдиз» СтIал Сулейманан райондин администрациядин пресс-къуллугъди хабар гайивал, Кьасумхуьруьн центр аваданлу авуниз талукьарнавай проект гъвечIи шегьеррани тарихдин метлеб авай хуьрера къулай шартIар арадал гъунихъ галаз алакъалу проектар патал малумарай Вирироссиядин XI конкурсда гъалиб хьана. И кар себеб яз, СтIал Сулейманан райондиз федеральный дережадин грант чара ийида.

Конкурсдин нетижаяр и йи­къара Москвада, милли «Россия» центрада, кьуна. Санлай къачурла, конкурсдиз уьлкведин жуьреба-жуьре регионрай­ 400-дав агакьна заявкаяр атанвай. Абурун арада гъалиб хьайи муниципалитетрик акатун гьакъи­къатдани чIехи агалкьун я.

Проектдин сергьятра аваз, Кьасумхуьрел Ленинан тIвар­цIихъ галай куьче, адаз мукьва мулкар, гьа жергедай яз, Дагъус­тандин халкьдин шаир СтIал Су­лейманан тIварцIихъ галай скверни аваданлу ийидайвал я. Проект гьазурдайла, чкадин агьалийрин меслятарни фикирда­ кьуна: абурухъ галаз гуьруьшар кьиле тухвана, проектдин сергьятра аваз, теклифзавай вири месэлаяр санал веревирдна ва эхиримжи вариант сесер гана хкяна.

Къейд ийин хьи, ихтилат физвай конкурс, «Инфраструктура для жизни» милли проектдин сергьятра аваз, гьар йисуз тешкилзава.

Агьмед Магьмудов