ЧIехи Гъалибвилин суварин вилик СтIал Сулейманан районда, лишанлу вакъиадиз талукьарна, машинар цIиргъина аваз финин (автопробег — хъсан адетдиз элкъвенвай мярекат) тешкилнавай. Райадминистрациядин пресс-къуллугъдин малуматда хабар гузвайвал, машинрин рехъ «Эбеди цIай» мемориалдилай башламиш хьана. Автопробегдин иштиракчийри мемориалдал цуьквер эцигна, са декьикьада кисна акъвазуналди, дяведа телеф хьайибурун экуь къаматар рикIел хкана. Анлай Гъалибвилин Пайдах гваз машинри райцентрадихъ рехъ давамарна. Абур районэгьлийри шаддиз къаршиламишзавай.
Райадминистрациядин дараматдин вилик автопробегдин иштиракчияр райондин кьил Саид Темирханова къаршиламишна. Ватанпересвал къалурунай, Ватандин ЧIехи дяведа чи ата-бубайрин игитвилер рикIера хуьнай абуруз сагърай лагьана.
ЦIиргъина авай машинрин рехъ Цмурдал — Ватандин ЧIехи дяведин иштиракчи, генерал-майор Мегьамед-Гьанифа Шайдаеван экуь къаматдиз бахшна, волейболдай районрин арада ачух турнир кьиле физвай чкадал — акьалтIна. Ам ачухдалди вилик С. Темирханова машгьур военачальникдин памятникдал ва Ватандин ЧIехи дяведа чанар гайи ксариз хкажнавай монументдал цуьквер эцигна, абуру къалурай игитвал ва Ватандиз вафалувал рикIел хуьзвайди къейдна. Райондин регьберди виридаз ЧIехи Гъалибвилин югъ тебрикна. Ада Цмур игитралди машгьур чка тирди, генерал-майор М.-Гь. Шайдаева абурун арада кьетIен чка кьазвайди, акьалтзавай несилдиз ватанпересвилин тербия гунал гьалтайла, ихьтин серенжемрихъ еке важиблувал авайди къейдна. Шайдаеврин хизандиз ада сагърай лагьана. Абуру хайи хуьруьн абадвал патал еке зегьмет чIугвазвайди къейдна. Спортсменрин хьиз, Ватан хуьзвайбурун тIварунихъни С. Темирханова чими келимаяр лагьана. Абуру ата-бубайрин рехъ давамарзавайди, Ватандин вилик пак буржи абуру намуслудаказ кьилиз акъудзавайди къейдна.
Гуьгъуьнлай къизгъиндаказ кьиле фейи къугъунрин нетижада Курхуьруьн волейболистрин командади — 1, Герейханован хуьруьн — 2, Агъа СтIалрин командади 3-чкаяр кьуна. Абуруз ва турнирда тафаватлу хьайи спортсменриз райадминистрациядин патай кубокар, медалар, дипломар ва пулдин пишкешар гана. Мярекат Гъалибвилин музейдиз экскурсия тешкилуналди акьалтIна.
Рагнеда Рамалданова
____________________
И йикъара «Ахцегь» спорткомплексда, ЧIехи Гъалибвилин 80 йисан юбилейдиз талукьарна, Ахцегь райондай дяведин махсус серенжемда Ватан патал чанар гайи игит аскерар эбеди рикIел хуьнин лишан яз, РФ-дин Игит Энвер Набиеван призар патал азаддаказ кьуршахар кьунай жегьил пагьливанрин арада республикадин «Чун — гъалибвилин невеяр» турнир кьиле фена. Ана Дагъустандин саки вири районрин, гьакI Чечнядин командайрик кваз 150-дав агакьна Россиядинни Дагъустандин чемпионатрин гъалибчийрини призёрри иштиракна.
Багьа мугьманар яз ана РФ-дин Игит Энвер Набиева, адан буба Альберт Набиева, Мегьарамдхуьруьн, Кьурагь, Докъузпара районрин регьберри — Фарид Агьмедова, Замир Азизова, Мегьамед Шамилова, гьакIни РД-дин МЧС-дин кьилин Управленидин начальник, полковник Муслим Девришбегова, Кьиблепатан Дагъустанда «Память гор» ДРОО-дин векил, подполковник Ренат Ханмегьамедова, рухсатдиз хтанвай СВО-дин аскерри, машгьур пагьливанри, гьа жергедай яз спортдин ветеран Къариб Ашуралиева, Шамил Мамедова, Агьмед Тажудинова, Даурен Куругълиева, Мугьаммад Эминова ва гзаф масабуру иштиракна.
Россиядин ва Дагъустан Республикадин гимнияр тамамарайдалай, СВО-да телеф хьайи игитар рикIел хуьн яз, са декьикьада кисна акъвазайдалай кьулухъ микрофондихъ райондин регьбер, турнирдин спонсор Абдул-Керим Палчаев атана. Ада хъсан адетдиз элкъвенвай и акъажунрин мурад-метлебдикай лагьана, адан иштиракчиярни мугьманар тебрик авуналди, спортдин сувар ачухна Турнирдин тешкилатчийринни иштиракчийрин тIварарихъ тебрикрин хуш келимаяр мярекатдал рахай маса ксарини лагьана. Э. Набиева турнир вини дережадин тешкиллувал аваз кьиле тухунай райондин кьил А.-К. Палчаеваз чухсагъул лагьана. Ахцегьрин искусствойрин школадин аялри кьуьл авуналди ва Дагъустандин культурадин лайихлу къуллугъчи, райондин дишегьлийрин советдин председатель Таира Муспагьовади ватанперсвилин «Зи Россия» мани тамамаруналди залда авайбурун гуьгьуьлар шадарна.
Гуьгъуьнлай къизгъиндаказ кьиле фейи акъажунрин нетижада гъалибчияр майдандиз акъатна. ИкI, 1, 2 ва 3-чкаяр кьурбуруз талукь тир дережайрин медалар, дипломар 30, 20 ва 10 агъзур манатдин кьадарда аваз пулдин пишкешар гана. 10 агъзур манатдин кьадарда авай пулунин пишкешар чемпионрин тренерривни агакьна. Призёррин жергедик, гьайиф хьи, чкадин жегьил пагьливанар акатнач. Гьелбетда, и карди районда спортдин азаддаказ кьуршахар кьунин хилен кIвалах республикадин амай районрилай хейлин зайифзавайдан гьакъиндай шагьидвалзава.
Дашдемир Шерифалиев
