«Дагводсервис» ГКУ-дин пешекарри Самур вацIун къерех мягькемардай (банд кьадай) тадаракар туькIуьрунин са жерге кIвалахар акьалтIарнава. Габиондин жуьредин, яни симиникай хразвай ва тIебии тир гьар жуьредин шейэралди (месела, къванералди) ацIурзавай тадаракрин яргъивал 2 200 метрдиз барабар хьана.
РД-дин тIебиатдин ресурсрин ва экологиядин министерстводи хабар гузвайвал, гила вацIун эрчIи пад ихтибар ийиз жедайвал мягькемарнава, яшайишдин кIвалер, абурун патарив гвай участокар ва къурулушрин объектар хаталувиликай хкуднава. ВацIун цикай хуьдайвал туькIуьрнавай мулкарин умуми майдан 18 гектардиз барабар я. Яшайишдин къурулушрин объектрин арада гьакIни виниз тир гужлувилин газдин турба ва республикадин дережадин важиблувал авай машинрин шегьре рехъ ава.
Банд туькIуьрунин нетижада, живер цIрайла, марфар къвайила, къведай селлери гун мумкин тир 250 миллион манатдилай гзаф зарардикай хуьз алакьнава.
Алай вахтунда, хабар гузвайвал, РД-дин «Дагводсервис» ГКУ-ди и тадарак Дагъустан Республикадин хсусият тирди официальнидаказ тестикьарун патал документар гьазурзава. Ахпа объект чкадин самоуправленидин органдин ихтиярда вугуда.
«Лезги газет»
