Дербентда столдал къугъвадай теннисдай кардик квай «Къеле» клубди­ жуьреба-жуьре, гьа гьисабдай яз лишанлу йикъариз талукьарнани, турни­рар кьиле тухуналди, Кьиблепатан­ Да­гъустанда спортдин и жуьре ви­лик­­ тухуниз куьмекзава. 

Са тIимил вахт идалай вилик, Россиядин халкьарин садвилин йисаз талукьарна, тешкилай­ спортдин серенжемда­ Махачкъала,­ Дербент, Дагъустандин Огни, Кас­пийск­, Хасавюрт, Избербаш шегьеррай­, Къаякентдай, Гурбукидай­ тир 400-далай виниз баллрин рейтинг авай теннисист­риз чпин алакьунар къалурдай мумкин­вал хьайидини рикIел хкиз кIанзава.

И йикъара Дербентда «Къеле» командадин кьилин тренер Арслан Бабаеваз бахшнавай ачух турнир кьиле фена. Ана Дербентдиз мукьва районрай тир спортсменрихъ галаз, сифте сефер яз, Кьурагь райондин жегьилрини столдал къугъвадай теннисдай чпин алакьунар къалурна, хъсан нетижаяр къазанмишна. ИкI, тренер Рамиз Гьашумован гъилик вердишвилер къачузвай жаван теннисистар Катибов Мугьаммад, Къурбанов Самир ва Къурбанов Умар (и жегьилри алатай гьафтеда Кьурагьа кьиле фейи ачух турнирдани чпин устадвал къалурайди рикIел хкиз кIанзава) хъсандиз къугъунай грамотайриз ва медалриз лайихлу хьана.

Рагнеда  Рамалданова