ЦIаяр кьунин вилик пад кьун патал кьабулзавай серенжемар артухарун себеб яз, майдин вацран суваррин вахтунда Дагъустандин тамухъанвилин мулкара цIаяр кьур са дуьшуьшни хьанач.
Къейдзавайвал, адет яз, и вацра тамара ял ядайбурун кьадар гзаф жезвайди фикирда кьуна, РД-дин тамарин майишатдин Комитетдин регьбер Вагьаб Абдулгьамидова идарадик квай вири тамухъанар месэладал кьетIен фикир желб авунин патахъай тагькимарнавай. Комитетдин пресс-къуллугъди хабар гузвайвал, кьилди къачуртIа, Самурдин лесничествода госинспекторри полициядин къуллугъчийрихъ галаз санал туристри рикI алаз сейрзавай чкайрал гуьзчивал артухарна.
«Ял язавайбурухъ галаз цIаяр кьунин ва михьивал хуьнин месэлайрин жигьетдай гъавурда твадай суьгьбетарна. Гуьзчивалзавай вахтунда тамарин законодательство чIурай дуьшуьшар хьанач. Татугай гьаларин вилик пад кьун патал 8 сеферда суьгьбетар кьиле тухвана ва 20 касдиз и месэладиз талукь листовкаяр гана», — хабар гузва идаради.
Амина Муслимова
