20-майдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз промышленностдин суьрсет къанунсуздаказ маса гунин вилик пад кьунин жигьетдай кардик квай Комиссиядин заседание кьиле фена.
«Лезги газетдиз» республикадин Гьукуматдин пресс-къуллугъди хабар гайивал, мярекатдин сергьятра аваз кар алай са шумуд месэла веревирдна ва абур гьялдай рекьерикай рахана. Абурун арада некIединни якIун суьрсетдин еридиз, дарманар маса гунал гуьзчивал тухуниз, тенбек, ички квай суьрсет къанунсуздаказ маса гуниз талукь ва са жерге маса месэлаяр авай.
НекIединни якIун суьрсетдин еридални хатасузвилел тухузвай гуьзчивилин гьакъиндай доклад Россельхознадзордин РД-да авай Управленидин регьбер Рамазан Рамазанова авуна. Ада хабар гайивал, Управленидин пешекарри республикада кьиле тухвай ахтармишунрин нетижада, къанун-къайдадал амал тавуна, некIедин суьрсет гьасилзавай кьве кархана винел акъудна: Бабаюрт районда — «Молкомбинат Южный» ООО ва Къизляр районда — «Кизлярские сыры» ООО. Абуруз талукь яз герек тир серенжемар кьабулнава. НекIединни якIун суьрсет гьасилзавай карханайрал тухузвай гуьзчивал артухардайвал я.
Комиссиядин заседанидин кIвалахдикай гегьеншдиз РД-дин Гьукуматдин сайтдай кIелиз жеда.
Чи мухбир
