Кьве вишдав агакьна ктабар авай зи хсуси библиотека цIийи пуд ктабдалди девлетлу хъхьана. Абур «Куьредин ярар» культу­радин центради ва «ЦIийи Кавказ» дестеди акъуднавайбур я: «Хъсанвал ва писвал», «Шарвилидиз­ эвера!!!» ва «Шаиррин эсерар». Пуд ктабдални координатор яз алим ва писа­тель Гьаким Къурбанан тIвар къалурнава.

«Хъсанвал ва писвал» сифте гафу­нин­ чкадал ганвай Дагъустандин халкьдин шаир Майрудин Бабаханован­ «Кхьихь, шаир, валай бахтлу кас авач…» шиирдилай башламиш жезва. Гуьгъуьн­лай Алкьвадар Гьасан эфендидин «Азадвал», Етим Эминан «Нефс», СтIал Сулейманан «Пис инсан» ва маса шиирар къвезва. Ктабда­ гьатнавай эсеррин гзаф авторар кIелзавайбуруз хъсандиз танишбур я: СтIал Мислимат, Пакизат Фатуллаева, Саират, Абдурагьман Межидов, Сардар Абил, Гуьлжагьан Мисриханова, Минаят Муталибова... Абурулай гъейри, кIелзавайбуруз тIимил ва я ерли таниш тушир тIварарни ава.

«Шаиррин эсерар» ктаб 26 автордин 57 эсердикай ибарат я. «Шарвилидиз эвера!!!» тIвар ганва, чинал хенжел гваз балкIандал алай пагьливандин шикил ала. За ктабда къагьриманвилин эпосдиз­, чи чил хвейи пагьливандиз бахшнавай шиирар ава лагьана фикирнай. Зун ягъалмиш хьана. Ктабдин сифте кьиляй кхьенва: «Ктабда­ хизандиз, муьгьуьббатдиз, вафалувилиз талукь хкягъай эсерар гьатнава…»

За са кардиз мадни фикир гана: пуд ктабда авай эсеррин авторарни гьа садбур я. Садазни чин тийиз­вай «шаиррин» эсерар ктабра гьатайла, бес машгьур, гьатта Дагъустандин халкьдин шаиррин (гьич тахьайтIа, СтIал Сулейманан райондай тирбурун хьайитIани) эсерар ктабра гьат тавун дуьз кар жез­вани? Зи фикирдалди, – ваъ. Белки, шаиррин арадани хайибур ва тахайбур аватIа?

Са бязи «цIийи шаиррин» тIварарин кIа­­никай «Лезги писателрин союздин член», «РФ-дин журналистрин союздин член» гафар кхьенва. Яраб гьакI я жал? ЦIийи ктабра авай эсерриз, са рахунни алачиз, кIелзавайбуру дуьз къимет гуда.

Хазран Кьасумов