15-июлдиз Ахцегь райондин­ Че­перин хуьре дагъвийрин азадвилин женгерин кьиле акъвазай кьегьал хва Гьажи­ Да­вуд рикIел хкуниз талукьарнавай мярекат кьиле­ фена. Ам Гьажи Давудан тIвар­цIихъ галай­ фондуни (председатель – Нариман Фаталиев) тешкилнавай.

Мярекатда Ахцегь, Докъузпа­ра, Мегьарамдхуьруьн, СтIал Су­лейманан, Дербент, Табасаран районрай атанвай ва пата­рилай хтанвай мугьманри – мис­кIинрин имамри, жемиятдин дея­телри, муаллимри, тарихдал, ме­деният­дал рикI алай ватан­эгь­лийри иштиракна. Абурун арада Ахцегь райондин депутатрин собранидин­ председатель Гьажи­мурад Парпачев, Мегьарамдхуьруьн райондин депутатрин соб­ранидин депутат Рамазан Закиржяев, Свердловскдин областдай хтанвай жемиятдин деятель Расим Закиржяев, ФЛНКА-дин векил Жалалдин Абдуразакьов, Дербентдай хтанвай Пира­ли Пирали­ев, Ахцегьрин хуьруьн­ жуьмя-мискIиндин имам Абдулгьашим гьажи ва масабур авай.

Мярекатдал рахайбуру Гьажи Давудан кьегьалвилерикай, тарихдин вилик адан лайихлувилерикай, ватанпересвилин тербиядикай ихтилатар авуна ва ихьтин серенжемар мукьвал-мукьвал теш­килун важиблу тирди къейдна.

Мярекатдин сергьятра аваз гьакIни аялрин арада виридалайни хъсандиз Къуръан­ кIе­лунай конкурсни тухвана. Гъалибчийриз пишкешар гана.

Са шакни алачиз, чи хайи районра, хуьрера чIал, тарих, адетар хуьниз ва вилик тухуниз, кьегьалрин тIварар эбеди авуниз­ талукьарнавай мярекатар гьи­кьван­ пара хьайитIа, гьакьван хъсан я. Сифте нубатда – акьалтза­вай несилар патал.­ Гьи­кьван абур руьгьдин ивирриз мукьва хьайитIа, гьакьван абурун ватанпересвилин гьиссерни мягькем жеда.

Чи мухбир