Дагъустанда республикадин регьбер Фёдор Щукинан теклифдалди «Команда Дагестана» лишандик кваз цIийи программа кардик кутунва. Лагьана кIанда, адаз ухшар авай проектар регионда идалай вилик йисарани арадал гъанай. ТIварар гьар жуьрединбур ятIани, абурун макьсад сад я: дагъустанвийрин арадай алакьунар, чирвилер авайбур винел акъудун ва абур гьукумдин органриз желб авун.

РД-дин Кьилин Администрациядин телеграм-каналди хабар гузвайвал, алай вахтунда винидихъ тIвар кьур программада иштиракун патал 2600-лай виниз агьалийрилай арзаяр атанва. Абурун чIехи пай «Государственное и муниципальное управление» хилез талукь я. Амай арзайрин кьадардиз килигайла, 2-чкадал – образованидин, 3-чкадал здравоохраненидин хилер ала.

Фёдор Щукина къейд авурвал, «Команда Дагестана» программада иштиракзавайбур «жуванбурузни» «чарабуруз» пайдач, сифте нубатда алакьунриз къимет гуда. Лайихлу ксар лайихлу дережайривни агакьда. Вири иштиракчияр патал къимет гузвай къайдаярни сад я.

Чи мухбир