Ватандин азадвал хуьник ва Гъалибвал къачуник пай кутурбурукай сад зи ата-буба Гьажибала Кьасумов я. 1908-йисуз дидедиз хьайи адаз 1942-йисан 20-январдиз Кьасумхуьруьн РВК-дай Яру Армиядин жергейриз эвер гана.

Зи ата-бубади Кавказдин шегьерар ва хуьрер душмандикай хуьн патал кьиле фейи ва маса женгера иштиракна, кьегьалвилер къалурна. Женгерин рекьерай ам Румыниядиз кьван фена.

«Кавказ хуьнай», «Дирибашвиляй», «Германиядин винел гъалиб хьунай» ва маса медалри, И. В. Сталина чухсагъул малумаруни зи ата-буба кьегьал кас хьайидан гьакъиндай шагьидвал ийизва. 1944-йисуз Гьажибала буба фронтда телеф хьана лагьай чар хтанай. Амма и хабар таб акъатна. 1944-йисан женгера хьайи хирер сагъ хъхьайла, аскер хуьруьз хтанай.

Яргъал йисара Ялцугърин Етим Эминан тIварунихъ галай колхозда ва гуьгъуьнлай, 1966-йисуз хуьр арандиз куьч хьайила, Аламишеда эцигунрин материалрин базада къаравулвиле кIвалахай зи ата-буба Гьажибала Кьасумов 1975-йисан 17-октябрдиз рагьметдиз фена.

Ватан хвейи игит бубайрин тIварар чи рикIелай садрани алатдач.

Селминат  Кьасумова,

Эминхуьруьн юкьван школадин ­8-классдин ученица