Чирвилерин суварин юкъуз РФ-дин Игит, Энвер Набиев Ахцегь райондин активдихъ галаз гуьруьшмиш хьана

Тарихдин итижлу делил. Россиядин тарихда Госдумадиз Ахцегь райондай (Самурский округдай), сифте депутатар яз, 1907-йисуз (II созыв) Абдулжа­лил Къухмазов (лап хъсандиз са шумуд­ чIал чидай ам Кьиблепатан Дагъус­тан­да пачагьдин чиновникрин таржумачи тир. Адан хва Мурадханакай машгьур актёр­, РСФСР-дин халкьдин артист хьана) ва Да­гъустандин областдайни Закаталы ок­ругдай медицинадин рекьяй кьилин образование къачур сифте дагъус­танви Бей-Бала-бег Султанов хкянай.

Сифте гаф рахуналди, мярекат «Ахцегь район» МР-дин кьил Абдул-Керим Палчаева ачухна. Ахпа Энвер Альбертович куьрелди вичин уьмуьрдинни женгинин рекьикай рахана.

 Чеперин хуьряй тир Энвер Набиев 1988-йисан 3-февралдиз Каспийск шегьерда дидедиз хьана. 6-нумрадин школада кIелна. РикIе гъвечIи чIавалай офицер хьунин ният авай ам школа куьтягьайла Казань шегьердин танковый высший училищедик экечI­на. Ам агалкьунралди акьалтIарай 2010-йисалай 2022-йисалди взводдин командирвилин къуллугъдилай танкарин батальон­дин штабдин начальниквилин ва командирдин заместителвилин­ къуллугъдал хкаж хьана, къуьнерал майорвилин чин атана. Женгинин­ махсус серенжемдин сифте йикъалай ви­кIегьвилелди нацистрин хура акъвазнавай жегьил дагъвиди вич рикIе кичI авачир офицер, кар алакьдай женгчи командир яз къалурна.

Дагъви игитдин женгинин алакьунрикай куьрелди ла­гьайтIа, 2022-йисан 28-февралдиз Иванков – Бородянка галай пата Энверан взводди душмандал кьетIи гьужумна (50 кас тергна, 3 БМП ва дяведин маса техника кукIварна), кьулухъай къвезвай кьилин къуватриз рехъ ачухна. Берёзовка хуьруьн патав жуванбурун далу патан десте гьалкъада гьатайла, Набиев БТР гваз юлдашрин патав­ акъатна, элкъвена душмандин гьужумрикай хуьдай оборона кьуна, куьмек агакьдалди 5 суткада нацистрихъ галаз барабарсуз къуватрин женг тухвана. Нико­лаевка районда Энвера, чинеба рехъ атIа­на, душман цIун гьалкъада туналди, ВСУ-дин 61 аскер есирда кьуна ва къиметлу малуматар жаг­ъурна…

– Гьуьрметлу районэгьлияр! Уьмуьр санал акъвазнавач, виликди физва, дегишвилер жезва. Аквазва хьи, уьл­кведа образованидин, медицинадин, культурадин хилера­ хъсанвилихъ­ аквадай хьтин дегишвилер жезва. Гьаларизни мумкинвилериз килигна, жуван райондиз вири патарихъай алакьдай куьмекар ийиз­ алахъда.

Зун къе райондин кьил Абдул-Керим Нажмудиновичахъ галаз Ахцегьа кIвачи-кIвачи къекъвена. РикIиз хуш хьана. Гьич чир техжервал дегиш жезва Ахцегьар. Разивилелди къейдин, райондин руководстводин алахъунралди эхиримжи 3-4 йисуз район рес­публикада гзаф терефрай кIвенкIвечи чкадал ала. Гележегда ам мадни хъсанариз, вилик кутаз алахъда, – алава хъувуна РФ-дин Игитди.

Гуьруьшдал гьакI районда федеральный балансдал алай, ишлемиш тийизвай­ чилер аялрин бахчаярни школаяр ва яша­йишдин метлебдин дараматар эцигун­ патал вахкун хьтин, гьакIни яргъал йисаралди гьялиз тежезвай бязи четин месэлаярни кудна.

Энвер Набиева вичин тIварцIихъ хуш келимаяр лугьунай районэгьлийриз чухсагъул малумарна.

Абдул-Керим Нажмудиновича вичин ва вири районэгьлийрин патай РФ-дин Игит Энвер Набиевичан тIварцIихъ алхишдин гафар лагьана. «Вун чи халкьдин дамах, баркаллу хва я…», – алава хъувуна ада.

Эхирдай къейдин, чи баркаллу ватан­эгьли РФ-дин Игит Энвер Набиев, шаксуз, неинки са райондин, гьакI лезги халкьдин, вири Дагъус­тан­дин дамах я.

Дашдемир Шерифалиев