ЦIийи ктабар

Зи ктабрин кьацI мукьвара мад са цIийи ктабдалди девлетлу хъхьана. Ам туькIуьрайди кIелзавайбуруз фадлай чизвай, Мегьарамдхуьруьн райондин Советский хуьре яшамиш жезвай журналист, шаир Сулейман Пашаев я.

100 экземплярдин тираж аваз «Мавел» чапханада акъат­навай «Илгьамдин булахар» ктабда ери-бине Ялцугърин хуь­­ряй (Ахцегь район) тир къелемчийрин яратмишунар (шии­рар, гьикаяяр, юморескаяр, ма­къалаяр) гьатнава. Авторди-туь­кIуьрайда къейдзавайвал, 180 кIвал аваз хьайи Ялцугърин хуьряй 17 писатель акъатнавайди малум я. Абурун эсерар кIватIна, 312 чиникай ибарат ктаб гьазурун патал С. Пашаева вижевай зегьмет чIугунва. 

Кьилди къачуртIа, кIватIалда Ялцугъ Эминан (абур Насруллагь Нуридини Майил Эфендиева таржума авунва) шиирри кьетIен чка кьазва. Я.Эминаз маса шаирри бахшнавай шиирар чапнава. Эдебиятдал рикI алайбурувай ктабдай мад Нури­ Эфендидин, Али Муьжруьм Та­гъизадедин, Насруллагь Нуридин, Агьмед Агьмедован, Мегьерам Ризаеван, Майил Эфендиеван, Сулейман Пашаеван, Фатма Гьасаналиевадин, Гуьлбиче Гьабибовадин, Шура Абдурагьмановадин, Эмируллагь Мегьерамован, Арсен Къари­бо­ван, Эсфира Хаспулатовадин, Фазил Гьабибован, Намедин Исмиханован эсерар кIелиз ­жеда.

Заз чиз, алатай ва чи йикъа­рин несилрикай тир ялцугъвий­ри эдебиятдик кутунвай пай ла­йихлуди я. Идан гьакъиндай чи гъиле авай ктабди шагьидвалзава.

Л. Фетгьуьллагь

________________________________________________________

Сулейман Пашаеван «Илгьамдин булахар» ктаб еке зегьметдин нетижа я. Къенин­ юкъуз­ ктаб кхьин, материал кIватIун регьят кIвалах туш. Ктаб арадал­ гъун еке вакъиа­ я; гьар хуьрериз кьисметди куь­чарнавай Ялцугърин агьалий­рин арада яратмишунрал машгъулбуру теснифай затIар кIва­тIун, абур тайин са къайдада тун, пулунин такьатар жагъурун, гьелбетда, зегьмет чIу­­гуна кIанзавай кар я. 

Хуьруьнвийрин эдебиятдин тарих чпиз, вири лезги халкьдиз ашкара авун еке алакьун я. Хуьруькай, адан зегьметдал рикI алай ва еке агалкьунар хьанвай ксарикай ктабда гьатнавай делилар тариф авуниз лайихлу я.

Ктабда, муьгьуьббатдин темадилай гъейри, девирдин зидвилерикай, тарихдин вакъиайрикай, диндикай, якъин тир дуьшуьшрикай, яшайишдин чирвилерикай, ханарикай, беглерикай кхьенва.

Эсеррин жанрайрикай ра­хай­­тIа, гъезелдин жуьрени ава. Хуьруьн тарихдал рикI алайбуру зегьметдалди, яратмишунрал­ди чеб халкьдин гегьенш къата­риз машгьур авур агьалийрикай­ теснифнавай затIар арадал гъанва. Са шакни алачиз, ктаб кIе­лайбуруз «Лепеяр», «Гуьзел­ къамат гьамишалугъ хуьда ри­кIе», «Муаллимдиз» ва маса эсерар, бейтералди кхьенвай мисалар лап рикIивай бегенмиш жеда.

Алаудин  Саидов,

Мегьарамдхуьр