«Нарма» фестиваль
Августдин эхирра къадим Дербент шегьердин Стlал Сулейманан тlварцlихъ галай паркуна алай аямдин искусстводин «НАРМА» фестиваль кьиле фена.
Пуд юкъуз (21-23-августдиз) давам хьайи адан проект галаз-галаз пуд йисуз чирвилер гунин «Завод культуры» платформади, РД-дин туризмдинни халкьдин художественный сеняткарвилерин министерстводи ва Дербент шегьердин администрацияди къуьн кутуналди тешкилнавай.
Фестивалдин спонсоррин жергеда ава: – кьилин амадаг яз «Дербент – вино» компания ва арт-резиденция «Сильно», стратегиядин амадаг яз «Вебе Тревел», гьакIни АО «Кавказ РФ», «Магнит у дома» ва ООО «Эффект Девелопмент».
Фестивалдин мярекатда РД-дин туризмдинни халкьдин художественный сеняткарвилерин министрдин заместитель, статс-секретарь Мегьамед Гьабибулаева, РД-дин хуьруьн майишатдин министрдин везифаяр вахтуналди тамамарзавай Иван Голуба, «Дербент-вино» компаниядин генеральный директордин заместитель Роберт Семендерова, «НАРМА» фестивалдин генеральный продюссер Максим Селенкова ва масабуру иштиракна.
Алай йисан фестиваль – «Навигация внимания» темадиз талукьарнавай. Им алай аямда виридалайни кьит хьанвай дикъет гун, рикlел гъун я. Пуд юкъуз кьиле фейи арт-фестивалди къваларив гвай шейэриз дикъет гуниз эвер гузва. Алай йисуз шегьерда 18 майдан (Дербентдин тарихдин пата – Нарын-Къеледа, магьалра, культурадинни архитектурадин объектра, XVII асирдин Хандин гьамамда, Х-Хl-асиррин къадим чиле авай цин гьамбарханада, Эрменийрин килисадин дараматда, алишверишдин «пассаж» центрада ва маса чкайра ачухнавай. Проектди Россиядин вири регионрай (Махачкъала, Дербент, Москва, Санкт-Петербург, Казань, Челябинск ва маса шегьеррай - художникар, кураторар, музыкантар, лекторар ва сеняткарар) атанвай 80 иштиракчи сад авуна.
Мярекат Иван Голуба ачухна ва лагьана: «Дербентдин гьуьрметлу агьалияр ва мугьманар. За квез и гуьзел мярекатни Россиядин Федерациядин пайдахдин йикъан сувар рикlин сидкьидай мубаракзава. Заз чир хьайивал, алай аямдин искусстводин фестивалдиз ганвай «Нарма» тlвар Дагъустанда цазвай ципицlрин са сортунин тlвар я. Чи министерстводин коллективдин патай за квез бахт, берекат ва сагъ-саламатвал хьун алхишзава».
Гуьгъуьнлай Мегьамед Гьабибулаева лагьана:
– Салам алейкум, мярекатдин гьуьрметлу иштиракчияр ва мугьманар! Сифте нубатда заз и мярекат тешкилуник къуьн кутунвай вирибуруз сагърай лугьуз кlанзава. «Нарма» фестиваль – им чи тарихдин са хел, алатай ва къвезмай вахтарин арада алакъа я. Гьар йисуз кьиле физвай и фестиваль йисалай-суз гегьенш жезва. Ихьтин проектри къадим Дербент шегьердин культурадин ирс цlийиз ачухардай ва культурадин туризм вилик тухудай алава мумкинвилер арадал гъида. Зун агъунва им хъсан адетдиз элкъведайдахъ ва шегьерэгьлийри мярекатдин тешкилатчийри чlугунвай зегьметдиз разивилин къимет гудайдахъ.
Анал гьакlни чпин фикирар Дербент шегьердин администрациядин кьил Ханлар Пашабегова, Максим Селенкова ва масабуру лагьана.
23-августдиз атанвай багьа мугьманар фестивалдин программадик квай Бахтлу инсанрин куьчедихъ, алишверишдин «Пассаж» центрадихъ галаз таниш хьана, гамарин, декоративно-прикладной искусстводин музейриз ва Нарын-Къеледиз килигна.
Абуру алай аямдин искусстводи Дербентдин тарихдинни культурадин шартlар сад ийизвай выставкадин проектриз кьетlен фикир гана.
Чпин фикирар лагьай фестивалдин мугьманрини программадин жуьреба-жуьревал, метлеблувал, гзаф кьадар итижлу майданар ва алай аямдин искусстводалди Дербентдин тарихдиз цIийиз килигдай мумкинвал хьайиди къейдна.
Къагьриман Ибрагьимов