Важиблу везифаяр
Дагъустандин Гьукуматдин Председатель Мегьамед Рамазанова 13-октябрдиз «Россиядин машинар акъуддайбурун союздин» Дагъустандин региондин отделенидин заседанида иштиракна.
Мярекат Казбек районда, «Главрыба» экотуркомплексда, кьиле фена. Иштиракчийри машинар акъуддайбурун хел вилик финин, республикадин промышленностдин мумкинвилер гегьеншарунин ва санайидин карханайри гьукумдин органрихъ галаз санал кIвалахунин месэлаяр веревирдна. Машинар акъуддайбурун региондин отделениди 2024-2026-йисара авур кIвалахдин нетижаярни кьуна, 2027-йисуз фикир гудай кар алай хилер тайинарна.
Мегьамед Рамазанова къейдна хьи, республикадин промышленностдин мумкинвилер вилик тухунин карда Россиядин машинар акъуддайбурун союзди кьетIен чка кьазва.
«Ам карханайринни пешекаррин гьакIан кIватIал туш, производстводи, илимди, образованидини гьукумдин органри менфятлудаказ санал кIвалахдай майдан я. Къе чи вилик уьлкведин технологиядин аслу туширвал мягькемарунин, производство вилик тухунин ва инженеррин вини дережадин пешекарар гьазурунин важиблу везифаяр акъвазнава. И карда союздин роль иллаки екеди я. Жегьилриз республикада чпин пешекарвал хкаждай мумкинвилер акун, игьтияж авай пешеяр къачун ва чпин гележег Дагъустандин промышленностдихъ галаз алакъалу авун чун патал важиблу я…», – лагьана Мегьамед Рамазанова.
Союздин Дагъустандин отделенидин председатель Заур Гапизова кIватIалдин кIвалахдин кар алай хилерикай суьгьбетна. Абурук инженервилинни техниквилин пешекарар гьазурун, образованидин идарайрихъ ва промышленностдин карханайрихъ галаз санал кIвалахун, жегьилрин ва жемиятдин проектар уьмуьрдиз кечирмишун, региондин отделенидин кIвалахда карханайрин ва идарайрин иштираквал гегьеншарун акатзава.
Гъилевай йисуз союзди республикада инженеррин «Гъетер» олимпиада тешкилдайла, куьмек гана.
«СоюзМаш Дагестан» кIватIалди Дагъустандин гостехуниверситетди, «Профессионалитет» проектдин сергьятра аваз, «Машиностроение» хиляй образованидинни производстводин центраяр вилик тухуниз талукьарнавай конкурсда гъалибвал къазанмишдай шартIар тешкилна. Федеральный бюджетдай вуздиз 100 миллион манат гана.
Къейд ийин хьи, машинар акъуддайбурун союзди промышленностдин карханайрин, идарайрин ва технический вузрин къуллугъчияр сад ийизва.
Хийир Эмиров