Вирироссиядин дяведин, зегьметдин, Яракь­лу Къуватрин ва къайдаяр хуьдай органрин ветеранрин советдин региондин­ отделенидин председатель Магьарам Алижа­нова ватанпересвилин са мярекатдал къейд авурвал, дяведин махсус серенжем­да­ Украинадин миллетбазрихъ галаз игит­вилелди­ женг чIугвазвай цIуд агъзурдалай­ виниз да­гъустанвийриз гьукуматдин орде­нар ва медалар ганва. Абурун кьадар йи­къалай-къуз мадни гзаф жезва. Донбасс­дин­ чилел кьиле­ физвай женгер къизгъинбур, къурбандар галайбур­ я, чи бязи кьегьалрин игитвилер телеф хьайидалай гуьгъуьниз къейдзава. Абуруз талукь шабагьар чкадин гьукумдин органри, военкомат­рин векилри багърийрив вахкузва.

Россиядин Федерациядин Президентдин указдалди дяведин махсус серенжемдин иштиракчи, Хив райондай тир Салман Вердиеваз женгера къалурай викIегьвиляй, жуьрэтлувиляй, аскервилин буржи вафалувилелди кьилиз акъудунай Жуьрэтлувилин орден гана.

Райондин муниципалитетдин кьил Ярмет­ Ярметова гьукуматдин и шабагь аскердин уьмуьр­дин юлдаш Румая Вердиевадив вахкана. Гуьруьшда райондин собранидин председатель Садикь Исрафилова, Хив ва Агъул районрин военный комиссар Сулейман Гьуьсейнова, администрациядин къуллугъчийри ишти­ракна.

Ярмет Ярметова Вердиеврин хизандиз, ха­жалат чIугунивди, башсагълугъвал гана ва Салман Вердиеван кьетIен уьтквемвал къейдна.

Хив райондай дяведин махсус серенжемда цIудралди кьегьал рухвайри иштиракзава. Абурукай сад мотострелковый 164-ротадин гранатометчик Тимур Агьмедовни я. КичIевал течир, командиррин тапшуругъар галай-га­лайвал тамамарзавай, душмандиз гьар женги­на рикIелай тефидай ягъунар кьазвай аскердиз юлдашрин арада еке гьуьрмет авай. Нубатдин женгина душмандин гуьлледи адазни инсафнач.

Уьлкведин Президентдин указдалди адаз телеф хьайидалай кьулухъ «Жуьрэтлувиляй» медаль гана. Райондин кьил Ярмет Ярметова гьукуматдин шабагь Тимуран бубани диде Абидин ва Марина Агьмедоврив вахкана.

– Чи рухвайри Ватандин вилик чпин аскервилин буржи лайихлувилелди кьилиз акъудзава. Уьлкведин итижар, чи секинвал, саламатвал патал чанар къурбанд авур кьегьалар чна рикIелай ракъурдач, – лагьана райондин администрациядин кьили. – Абурун хизанарни чна текдиз тадач. Гьихьтин дерди аваз админист­рациядиз атайтIани, куьмекда.

*  *  *

Мегьарамдхуьруьн райондин администрацияда тешкилай мярекатда муниципалитетдин кьил Нариман Эфендиева Россиядин армиядин аскерар тир Тамерлан Сулейманован, Мирзекерим Куьребегован, Завир Абдулгъаниеван ва Раул Насруллаеван хизанрив Жуьрэтлувилин орденар ва Шамил Бабаеван багърийрив «Дяведин махсус серенжемдин иштиракчи» медаль вахкана.

Гуьруьшда райондин администра­ция­дин къуллугъчийри, хуьрерин админист­ра­цийрин­ кьилери, военный комиссарди ишти­ракна. СВО-да игитвилелди телеф хьайи кье­гьалрин­ багърийриз вирида башсагълугъвал­ гана, абур гьамиша рикIера хуьдайдакай­, акьалтзавай несилдиз чешне яз къалурдайдакай лагьана.

Нариман Эфендиева аскеррин багърийрихъ галаз кьилди суьгьбетна, абурун гьал-агьвалдикай, дердийрикай хабар кьуна. Герек чIавуз куьмек гудайдакай малумарна.

*  *  *

Дербент райондай дяведин махсус серен­жемдиз фенвай аскеррин кьегьалвилерни къейд авуниз ла­йихлубур я. Кьве уьтквем хва Ярамир Темирхановни Султан Хантемиров Россиядин Федерациядин Игит лагьай тIвацIиз лайихлу хьанва. Орденриз, медалриз лайихлу хьанвай аскерарни тIимил туш.

И йикъара Дербент райондин администрациядин кьил Эльман Аллагьвердиева телеф хьайи аскеррин диде-бубайрив, уьмуьрдин юлдашрив государстводин шабагьар вахкуниз талукьарнавай мярекат кьиле тухвана. Ана администрациядин къуллугъчийри, военкоматдин­, жемиятдин, жегьилрин тешкилатрин векилри иштиракна.

Телеф хьайидалай кьулухъ Жуьрэтлувилин орденар лейтенант Абди Пирмегьамедоваз (Агълабар), сержант Эльхан Мегьдиеваз (Нуьгди), сержант Аслан Манкъулиеваз (Белиж поселок), сержант Ильяс Алирзаеваз (Музаим), жергедин аскерар тир Тимур Якьубоваз (Геджух), Халилбег Халилбеговаз (Музаим), Жукован медалар сержант Тимур Маллакъурбановаз (Геджух), жергедин аскер Азер Агъашоваз (Нуьгди) ганвай.

Офицеррин, аскеррин багърийрихъ эл­къве­на, Э. Аллагьвердиева лагьана: «Сифте нубатда за квез башсагълугъвал гузва. Куьне Ватан кIани, адан итижар патал чанарни гьайиф текъведай халис игитар тербияламишна. Абуру вири четинвилериз таб гана. Командирри вилик эцигай тапшуругъар тамамарна, душман кьулухъ чIугуниз мажбурна. Донбассдин мулкар неонацистрикай азад авунин баркаллу карда иштиракай абур чна са чIавузни рикIелай алуддач.

Зи хизандайни дяведин махсус серенжемда стхади иштиракзава. Езнедал женгера залан хер хьана, ам исятда госпиталда ава. Зун куь гъавурда лап хъсандиз акьазва. Вуч куьмек герек атайтIани, заз хабар це, зун квез куьмек гуз гьазур я. Зи кабинетдин ва кIвалин ракIарарни квез гьамиша ачух я».

Нариман  Ибрагьимов