Дагъустанда акьалтзавай несилдин векилриз ватанпересвилин тербия гун кар алай месэлайрикай сад яз гьисабзава. Диде-бубадин, хайи чилин, Ватандин къадир авай ватанпересар­ чIехи авунин карда неинки хизанди, гьакIни жемиятдин жуьреба-жуьре ин­ститутри иштиракзава. Республика­дин шегьеррани районра мукьвал-мукь­вал­ Ватандин пак яржариз, баркаллу­ тарихдиз, хейлин вакъиайриз, суварриз талукьарнавай ватанпересвилин тах квай мярекатар кьиле тухузва. Ихьтин нубатдин мярекат 28-июлдиз Каспийск шегьердани кьиле фена.

«Лезги газетдиз» РД-дин Кьилин пресс-къуллугъди хабар гайивал, саласа­ юкъуз Дагъустандин Кьилин везифаяр вахтуналди тамамарзавай Фёдор Щукина Вирироссиядин аялринни жаванрин «Юнармия» жемиятдин гьерекатдин кьилин штабдин начальник, Россиядин Игит Владислав Головина Дагъларин уьл­кве­динни ватанпересвилин тешкилатдин­ арада идалай кьулухъ амадагвилин ала­къаяр жедайди тестикьарзавай документдал къулар чIугуна. Кьве терефди кутIуннавай икьрардин бинедаллаз, жегьилриз ватанпересвилин тербия гунин, и жигьетдай образованидин махсус прог­раммаяр арадал гъунин, виридалайни хъсан тежрибаяр кардик кутунин месэлайрай республикадин гьукумдин талукь органрини «Юнармия» гьерекатди санал кIвалахдайвал я.

Идалай гъейри, региондин мектеб­ра спортдин военно-прикладной жуьреяр кардик кутунин, жегьилрин кьатIунрин бажарагълувал артухардай, абур физический рекьяй вилик фидай шартIар арадал гъунин месэлаярни фикирда кьунва.

Документдал къулар чIугурдалай кьулухъ Фёдор Щукина военный спортдин «Юнфлот» къугъунин гъалибчийрив шабагьар вахкунин мярекатда иштиракна.

«Юнфлот» – им уьлкведин дережада аваз тухузвай военный спортдин къу­гъун я. Ана гележегда чпин уьмуьр Ватандин­ Яракьлу къуватрихъ галаз алакъа­лу ийидай ниятар авай, чпи гъвечIи чIа­ва­лай флотдин кьетIенвилер чирзавай от­ряд­дай тир юнармеецри иштиракзава. Къугъунин асас макьсадни жаванриз ватанпересвилин тербия гун, абур гьуьлуьхъ галаз алакъалу пешейрин гъавурда тун ва Россиядин дявединни гьуьлуьн флот патал пешекарар гьазурун я.

Алай йисуз къугъунин финалдин гьерекатар Дагъустанда кьиле фена. Ана лагьайтIа, уьлкведин жуьреба-жуьре регионрай тир 150 жаванди иштиракна.

– Къе чи республика патал кьетIен югъ я: Дагъустанди Ватан лап рикIивай кIанзавай, адан тарихдиз гьуьрметзавай­ вишералди гадаярни рушар садзавай Вирироссиядин военный спортдин «Юнфлот» къугъун кьабулнава, – лагьана Фёдор Щукина, мярекатдин иштиракчийрихъ элкъвена.

Ада ихьтин къарар кьабулунай «Юнар­мия» гьерекатдин кьилин штабдин начальник Владислав Головиназ чух­­сагъул малумарна.

«Лишанлу кар ам я хьи, къугъун кьиле тухун патал Каспийск шегьер хкяна­. Каспийск зегьметдин жуьрэтлувилин­ шегьер, Каспийскдин Яру Пайдах авай флотилиядин меркез я. Адан гимийри, чи Ватан хуьнин месэлаяр гьялиз, гьар юкъуз асант тушир къуллугъ кьиле тухузва», – алава хъувуна региондин регьберди.

Къугъунин финалдиз акъатнавайбурухъ элкъвена рахадайла, Фёдор Щукина къейд авурвал, абуру неинки са воен­ный рекьяй чпихъ хъсан гьазурвилер авайди къалурна, гьакIни жегьилри чеб халис ватанпересриз хас ерийрин сагьибар тирдини тестикьарна.

«Куьн гел жагъурунин кIвалахдални машгъул я, Ватандин тарих чирзава, хайи чил патал чанар къурбанд авур ас­керрин мемориалрихъ гелкъвезва, Гьуьр­метдин къаравулвал лайихлувилел­ди тухузва, куь таяр-туьшериз Россиядин тарих мадни­ хъсандиз чириз куьмекзава. Гьа ихьтин къайдада халис ватанпересвал арадал къвезва, тарихдиз гьуьрмет авун, алай вах­тунин гьакъиндай жавабдарвал гьиссун ва экуь гележег арадал гъунин карда иштиракдай къаст хьун кьегьалриз хас ерияр я.

Играми аялар! Чи уьлкведин виридалайни хъсан адетар давамарун, Ватан хуьн, мадни къуватлу авун куь хиве ава. Квехъ и рекье агалкьунар хьурай», – лагьана Дагъустандин регьберди.

Военный спортдин «Юнфлот» къугъу­нин нетижаяр кьурдалай кьулухъ гъалибчийрин тIварарни тайин хьана: 1-чка Татарстан Республикадай тир «Витязи» командади кьуна, 2-чкадиз Краснодардин крайдин «Варяг» команда лайихлу хьана, 3-чка Оренбургдин областдин «Юный моряк» командадиз кьисмет хьана.

Гъалиб хьайи командайрив шабагьар вахкунихъ галаз санал Фёдор Щукина Россиядин Игит Владислав Головинавни Дагъустан Республикадин Кьилин Разивилин чар вахкана.

Гегьеншдиз РД-дин Кьилин сайтдай кIелиз жеда.

Агьмед Магьмудов