И йикъара ДГПУ-да «Куь баркаллувал гьамишалугъди, куь игитвал эбеди я» лишандик кваз Дагъустандин милли сиясатдин ва диндин крарин рекьяй министерстводи, «Илимдинни край чирдайбурун центр» ДРОО-ди РД-дин Кьилин грантдин ва маса идарайрин куьмекдалди тешкилнавай форум кьиле фена. Ам Дагъустандин илимдинни край чирдайбурун центрадин регьбер, РД-дин юстициядин министерстводин общественный советдин председатель Ислам Мурадович Мегьамедова ачухна. Форумдин модератор ДГПУ-дин НИЛ-дин заведующий Разаханова Венера Пирмегьамедовна тир.
Видеоалакъадикай менфят къачуналди, РФ-дин Госдумадин депутат Бийсултан Хамзаева, Дагъустандин юстициядин министр Мустапа Генжеханован тIварунихъай адан заместитель Рабият Закавовади форумдин иштиракчийрин тIварунихъ чими келимаяр лагьана, веревирдзавай месэладин важиблувал къейдна. Махачкъаладин 8-нумрадин лицейдин жаван волонтёрри — «Россиядин лекьрен шарагри» ва Дагъустандин юстициядин министерстводин общественный советдин член, «Россиядин ватанпересвилин къуватрин Ассоциация» ДРО-дин регьбер Ажий Абиевади тамамарай ватанпересвилин «Мамаеван Курган» манийри кIватI хьанвайбурун руьгь хкажна.
Ислам Мурадовича къенин юкъуз санлай уьлкведа, республикада ватанпересвилин руьгьдаллаз тербия гуниз артух фикир гузвайди къейд авунихъ галаз сад хьиз, тарих рикIел хуьникай, ватанпересвилин руьгьдаллаз тербияламишуникай, санлай чи уьлкведин къудратлувал ибарат жезвай садвиликай чахъ къенин юкъуз и жигьетдай авай хъсан мисалралди девлетлу авунвай суьгьбет, дугъриданни, кIватI хьанвайбуруз гьар садаз таъсирдайди, лугьудайвал, рикIери кужумдайди тир.
Форумдин сергьятра аваз, чи къенин югъ тайинарзавай ва гележег вичелай аслу тир тарихдихъ, ам чир хьунихъ ва жегьил несилдал агакьарунихъ авай важиблувални къейд авуналди, и жигьетдай арадал къвезвай бязи месэлаяр, абур арадай акъудиз куьмекдай рекьер, теклифарни веревирдна. Ихьтин серенжемри, шаксуз, акьалтзавай несил лайихлудаказ тербияламишунин рекье еке роль къугъвазвайдал фикир желбна. ИкI, форумдин иштиракчийри алай вахтунда Украинада кьиле физвай дяведин махсус серенжемда Дагъларин уьлкведин аскеррини офицерри, игитвал къалуриз, жуьрэтлувилелди женг чIугвазвайди, чандилайни гъил къачуна, гъалибвилер къазанмишзавайди къейдна. МасакIа хьунни лазим туш. Къе абуру дагъвийриз хас тир дурумлувал, кьегьалвал, ватанпересвал къалурун абурув чпин чIехи бубайрилай агакьай тербиядин нетижа, абурун кар давамарун тирдал, гьикI хьи, чи чIехи бубайрини Ватандин ЧIехи дяведа кьегьалвилелди Ватандин итижар хвейидал, чпелай гуьгъуьнин несилдин векиларни ахьтин руьгьдаллаз тербияламишайдал кьетIендаказ фикир желб авуналди, гьам руьгьдин, гьамни бедендин сагъламвал авай кьегьалар, несилар инлай кьулухъни хьун патал абурув гъвечIизмаз и жигьетдай лайихлу тербия агакьаруниз, и месэлаяр, чна, чIехибуру гьар сада, кIевелай аннамишна, важиблу амай масабурухъ галаз сад хьиз, гьар йикъан гуьзчивилик кутуниз эвер гана.
Форумдин иштиракчийри акьалтзавай несил ватанпересвилин руьгьдаллаз тербияламишунихъ галаз алакъалу яз теклифарни гана, къенин юкъуз къалабулух кутазвай ва вилик пад кьуна кIанзавай са жерге месэлаярни гегьеншдаказ веревирдна.
Рагнеда Рамалданова
