И мукьвара  Япониядин Йокогама шегьерда сито-рю каратэдай дуьньядин 11-чемпионат кьиле фена. Ана – спортдин и жуьредин ватанда – чи ватанэгьли, вичин ери-бине СтIал Сулейманан райондин ЦIийи Макьарилай тир, алай вахтунда Подмосковьедин Деденево поселокда яшамиш жезвай, Н.К. Крупскаядин тIварунихъ галай СОШ-да кIелзавай, 14 йиса авай Саид Гьажимурадова буьруьнждин медаль къазанмишна. Японияда Россия машгьуруналди, чи руьгь хкажай жегьилдиз чна аферин, баркалла лугьузва.

Саид Гьажимурадов сито-рю каратэ­дай Виридуьньядин федерацияди (WSKF) тешкилнавай чIе­хибурун чемпионатда Рос­сиядин хкянавай командадик кваз чи халкьдин векилрикай иштиракай тек са спортсмен тир. Ада спортдин «Максимум» клубда кьилин тренер Константин Кочеткован гъилик вичин устадвал хкажзава. Гаф кватай чкадал лугьун хьи, тренерди вичини и чемпионатда къизилдин медаль къазанмишна. Спортдал Саид аял чIавалай машгъул жезва. Спортдин кесерлу майдандиз экъечIдалди жуьреба-жуьре акъажунра ва турнирра гъалибвилер къазанмишнава.

Къуй чи ватанэгьлий­рихъ – гьам гъвечIи­бу­рухъ, гьамни чIе­хи­бу­рухъ – дуьньядин спортдин кесерлу майданра мадни зурба агалкьунар хьурай!

Айсанат  Межидова,

ДГУ-дин филфакдин ОЖ-дин 2-курсунин студентка