Апрелдин эхирра Башкириядин меркез Уфада япариз зайифдаказ ван къвезвай спортсменрин арада дзюдодай Россиядин чемпионатда чи ватанэгьлийрини гъалибвилер къазанмишна. ИкI, вичин ери-бине Мегьарамдхуьряй тир Назим Саидов (60 кг къведалди заланвал авайбурун арада) — 1 ва вичин ери-бине СтIал Сулейманан райондин Кьулан СтIалдилай тир Рамалдан Магьарамов (73 кг заланвал авайбурун арада) 3-чкайриз лайихлу хьана.
РикIел хкин: тренер Садир Айвазован гъилик вичин устадвал хкажзавай Н. Саидова Россиядин чемпионвилин тIвар гила 2-сеферда къазанмишнава. 2022-йисуз Каспийскда кьиле фейи уьлкведин чемпионатдани ам 1-чкадиз лайихлу хьанай. Н. Саидова 2021-йисуз Парижда япариз зайифдаказ ван къвезвай спортсменрин арада дзюдодай дуьньядин чемпионвилин тIвар къазанмишна. 2019-йисуз япариз зайифдаказ ван къвезвай спорстменрин арада самбодайни ам Россиядин чемпионвилин тIварцIиз (57 кг-дин заланвал) лайихлу хьана.
Рамалдан Магьарамова Кьасумхуьрел кардик квай ДЮСШ-да тренер, дзюдодай дуьньядин чемпион Тельман Къурбанован гъилик 4 йис тамам хьайидалай кьулухъ вердишвилер къачузва. Ада япариз зайифдаказ ван къвезвай спорстменрин арада дзюдодай ва самбодай Россиядин чемпионатра гимишдин ва буьруьнждин медалар идалай вилик йисарани къазанмишнай. 2023-йисан августдиз Уфада кьиле фейи Гатун Сурдолимпиадада (япариз зайифдаказ ван къвезвай спорстменрин къугъунра) 71 кг заланвал авайбурун арада ам самбодай буьруьнждин медалдиз лайихлу хьанай.
Спортдин агалкьунар хьиз, чи миллетдин тIвар хкажзавай вири спортсменриз ва абурун тренерриз чна Гъалибвилин суварни мубаракзава. Къуй дуьнья ислягь хьурай!
Рагнеда Рамалданова
