Нубатдин агалкьунар
Чи халкьдин векилрикай вичихъ хъсан гележег авай спортсменрикай сад тир Жабраил Гьажиева жуьреба-жуьре акъажунра, гьа гьисабдай яз дуьньядин кесерлу майданрани вичин устадвал къалуруникай чна газетда малуматар мукьвал-мукьвал гузва. Са шумуд югъ идалай вилик ада Кеферпатан Осетия-Аланиядин меркез Владикавказда азаддаказ кьуршахар кьунай «Стхаяр тир Хадарцеврин кубок» международный турнирда буьруьнждин медаль къазанмишна. ИкI, 79 кг-дал къведалди заланвал авайбурун арада буьруьнждин медаль патал бягьсина Ж. Гьажиеваз Ростовдин областдай тир Сулейман Алиев 11:1 гьисабдалди кумукьна.
Къейд авун лазим я хьи, алай йисуз им Жабраил Гьажиева къазанмишнавай сад лагьай агалкьун туш. ИкI, Албаниядин меркез Тиранада апрелдиз кьиле фейи Европадин чемпионатдани ада буьруьнждин, июлдиз Венгриядин меркез Будапештда кьиле фейи рейтингдин турнирда гимишдин медалар къазанмишна.
РикIел хкин: 2018-йисалай Азербайжандин хкянавай командадик кваз вичин устадвал къалурзавай Ж. Гьажиева 21 йисал къведалди яшара авайбурун арада дуьньядин ва Европадин чемпионатра гъалибвилер къазанмишна. 2022 ва 2023-йисара ам Азербайжандин чемпионвилин тIварцIиз лайихлу хьана. СНГ-дин уьлквейрин II къугъунра чи ватанэгьлиди 74 кг-дин заланвал авайбурун арада къизилдин медаль къазанмишна. Дуьньядин спортдин майданра вичикай хабар ганвай кьегьалди тренер ва насигьатчи Вагьид Мамедован гъилик устадвал хкажзава.
Нубатдин агалкьун тебрик авунихъ галаз сад хьиз, чна Жабраилаз виликди фидай къуватар мадни артух хьун алхишзава.
Рагнеда Рамалданова