12-августдилай «Дербент-Махачкъала» рекье кьве шегьердин арада къекъвезвай кьве поезд 2401-километр­дин остановкадал («Нахалкент») акъвазун кардик кутунва­. Идакай Кеферпатан Кавказдин шегьеррин арада пассажирар санай масаниз тухунал машгъул компанияди хабар гузва. ИкI, 12-августдилай башламишна, «Дербент – Махачкала» рекье къекъвезвай ва Дербентдай нянин сятдин 6 жез 17 декьикьа амайла (17:43) ва пакаман сятдин 11-даз 20 декьикьа кIвалахайла (10:20), экъечIзавай кьве поездни «Нахалкент» станциядал акъвазариз башламишда.

ЦIийи къайда и хуьруьн агьалийрин къулайвал ва улакь тIем акакьдайди авун патал кардик кутунва.

ГьакIни, «Федеральный пассажиррин компания» АО-ди хабар гузвайвал, 15-августдалди «Дербент-Москва» рекье къекъвезвай 85-нумрадин поезддик плацкартдин цIийи 12 вагон гилигда. Абуру са гьал куьгьне хьанвай вагонар эвезда.

Дагъустандин транспортдин ва рекьерин майишатдин министерстводи хабар гузвайвал, вагонар цIийи хъувун муьштерийрин патай еке игьтияж авай и рекье пассажирриз къуллугъ авунин дережа хъсанарунихъ галаз алакъалу я.

ЦIийи вагонар кондиционерралди, биотуалетралди ва эхъведай чкайралди таъмин я. Идалайни гъейри, пассажиррин къулайвал патал абур розеткайралди ва телефонар зарядка ийидай USB-разъёмралди таъмин я.

РикIел хкин, шегьеррин арада къекъвезвай поездрин составар цIийи хъувунин сергьятра аваз, 2024-йисалай инихъ Да­гъус­тандив алай аямдин 6 электропоезд агакьарнава.

Чи мухбир