Абур дирибаш рухваяр тир

СтIал Сулейманан райондай дяведин махсус серенжемда цIудралди ватандашри иштиракзава­. Абуру женгерин майданда дирибашвал, уьтквем­­­вал къалурзава. Аскервилин буржи кьилиз акъуд­­дайла телеф хьайи кьегьалрин хизанрив и йикъа­ра райондин администрацияда государст­водин шабагьар вахкана.

Райондин администрациядин кьил Саид­ Темирханова жуьрэтлувилин орденар ЦIийи Макьай тир Рамидин Гьамидован, Ма­гьам­дали Мегьамедован ва Дербент рай­он­дин Хазар хуьре яшамиш жезвай Шафи Тагьирован багърийрив вахкана.

– Чи аскерри кьунвай кьинез, Ватандиз вафалувал къалурна, – лагьана С. Темирханова. – Абурун игитвилер са вахтундани чи рикIелай алатдач. Чав агакьай малуматрай, аскерри чпин везифаяр тирвал кьилиз акъудзавай. Гьужумзавай душмандин вилик пад кьазвай, командиррин тапшуругъар тамамаруналди, хуьрер миллетбазрикай азадзавай женгера викIегьвилелди иштиракзавай. Къе абур, гьайиф хьи, чи арада амач. Кьегьал рухвайрин игитвилер акьалтзавай несилриз гьамиша чешне ­жеда.

Райондин регьберди рухваяр телеф хьанвай хизанриз вичин, райондин агьалийрин ва республикадин­ кьиле авайбурун патай башсагълугъвал гана ва лагьана: «Чир хьухь хьи, СВО-дин кьегьалрин хиза­нар чпин дерт гваз кьилди амукьдач. Гьукумди ва муниципалитетди квез герек чIавуз лазим куьмекар ­гуда». 

Яшайишдин икьрар

Дяведин серенжемдив эгечIай чIав­а­лай РД-дин зегьметдин министерст­води ас­керриз ва абурун багърийриз куьмек гунин яшайишдин икьрарар ку­тIунунин къайда ишлемишзава.

Идаради хабар гузвайвал, къенин йикъалди гьахьтин 1324 икьрар кутIуннава. Абурун бинедаллаз дяведин махсус серенжемдин иштиракчийривай ва хизанривай алава дуллух къачуз, кIвалах жагъуриз, хсуси куьмекчи майишат вилик тухуз, хсуси кар ачухиз жеда.

Делилри успатзавайвал, яшайишдин икьрардикай менфят къачузвайбурун кьадар йикъалай-къуз гзаф жезва. 2026-йисан январдилай къенин йикъал­ди 456 икьрар кутIуннава. Абурукай 245 – СВО-дин иштиракчийрихъ ва 209 абурун­ хизанрихъ галаз. Санлай къачурла, 2022-йисалай гьукуматдин патай 374 аскердив ва абурун хизанрай тир 950 касдив куьмек агакьна.

РикIин сидкьидай

«Карчи дагъви дишегьлияр» ва «Дишегь­лийрин гьерекат» жемиятдин тешкилат­ри Белгороддин областдин районриз нубатдин куьмекдин пар ага­кьарна. И карда абуруз бизнесменрини жергедин агьалийри куьмекна.

Миллетбазрин ягъунрик акатзавай агьалийриз ре­кье тунвай шейэр гьар юкъуз герек къвезвайбур я: мес-яргъан, яшайишда­ ишлемишзавай химиядин товарар, парталар, аялар патал жуьреба-жуьре шейэр­. Об­ластдин кьиле авайбуру дагъустанвийрилай рази­вал авуна, мукьвал-мукьвал куьмекдин гъил яргъи ийиз­вай дишегьлийрин тешкилатриз сагърай ла­гьана.

Шабагьриз лайихлубур

Уьлкведин аслу туширвал, халкьдин ислягьвал хуьн, фашистар терг авун ва абурун зулумдикай Донбассдин агьалияр къутармишун патал кьиле физвай махсус серенжемда гзаф дагъустанвийри, гьа гьисабдай яз Дагъларин уьлкведин меркездин викIегь жегьилрини иштиракзава.

И йикъара Махачкъала шегьердин администрациядин кьил Жамбулат Салавова дяведин махсус серенжемда телеф хьайи аскеррин хизанрив ва багърийрив  государстводин шабагьар вахкана. 18 аскердин векилрив жуьрэтлувиляй орденар, Жукован, Суворован медалар вахкана.

Ж. Салавова къейд авурвал, и шабагьар чи аскерри къалурай дирибашвилин, игитвилин чешмеяр хьиз, Ватан хуьдай женгера чпин чанар къурбанд авур кьегьалриз гьуьрмет авунин лишанни я.

Шегьердин администрациядин кьили кьегьалрин хизанриз, багърийриз башсагълугъвал гана ва абур гьукумдин органри, муниципалитетди гьи патахъай хьайитIани куьмек гудайдахъ инанмишарна.

Гуьруьшдин вахтунда са бязи хизанри чпин дерди-гьалдикайни суьгьбетна. Абуру къарагъарай месэлаяр фикирдиз къачунва ва муципалитетди вичин гуьзчивиликай хкуддач.

Гьакъикъи делилар

Дагъустандин П. Гьамзатовадин тIварунихъ галай изобразительный искусствойрин музейда  шикилрин «Чна гьакъикъи делилралди тахсир кутазва» выставка ачухнава. Ам жуьреба-жуьре гзаф шикилралди девлетлу я. Абур дяведин махсус серенжем кьиле физвай чкайра ва дяведин гьерекатрихъ галаз алакъалу сергьятдин патав гвай Россиядин регионра янавайбур я.

Экспозициядин вири материалри Киевдин миллетбазри ислягь агьалийриз ийизвай мусибатдин зулумрикай, террориствилин гьерекатрикай, кол­лек­тив­ный западди Россия магълуб ийиз кIанз тухузвай таблигъатдикай,  къвезмай несилар патал тарихдин вакъиайрин гьакъикъивал рикIел хуьникай суьгьбетзава.

Выставкада фотокорреспондентар Данила Дмит­ракован, Евгений Биятован, «Новости РИА-дин», РФ-дин МЧС-дин, «Мариуполь-Инфодин», Донецкдин, Луганскдин, Белгороддин, Брянскдин, Орелдин областрин ва Севастополь шегьердин шикилар ядайбурун материалар ишлемишнава.

Важиблу къефле

– Республикадин «Дагъларин гьунарлувал» ­прог­рамма регион вилик тухуз куьмек гудай лап ­ви­жевай проект я,  –  лагьана Дагъустандин МЧС-дин министрдин везифаяр вахтуналди тамамарзавай ­Нариман Къазимегьамедова, программадин­ ишти­ракчийрихъ галаз гуьруьшмиш хьайила. –  Программадин сергьятра аваз, чирвилер ва вердишвилер къачур къефледин важиблувални екеди я. Программа акьалтIнава, ана чирвилер къачур цIудралди жегьилри – дяведин махсус серенжемдин иштиракчийри, ветеранри – республикадин аваданвал, мублагьвал, инсанрин хушбахтлувал патал зегьмет чIугвада.

КIелунрин вахтунда программадин иштирак­чийри идара авунин алай аямдин технологияр, госу­дарстводин ва муниципальный къурулушра регь­бервал гунин, бегьерлу кIвалах тешкилунин, гьакIни экономикадиз, финансриз, рекъемрин технологийриз талукь чирвилер ва вердишвилер къачуна. Политикри, экономистри, министерствойрин, ведомст­войрин пешекарри, алимри гайи чирвилер абур ­патал кIвалахда агалкьунар къазанмишдай хъсан бине я.

– Дяведин махсус серенжемда куьн гьар жуьре уламрай, четинвилерай викIегьвилелди экъечIна. Зун инанмиш я хьи, гьа жуьреда куьне государст­водин  органра,  муниципалитетра  ва  маса  идарайра уьтквемвилелди, гьевесдивди кIвалахда. Хъсан сят хьурай квез, – алава хъувуна Н. Къазимегьамедова.   

Дагъустанвийрикай – Ставропольеда

Ставрополдин крайда авай Дагъустан Республикадин векилханада «Дяведин махсус серенжемдин иштиракчияр-дагъустанвияр – Россиядин Игитар» выставка ачухнава.

Экспозицияда дяведин махсус серенжемда дирибашвал, игитвал къалурай, Россиядин Федерациядин Игит лагьай тIварцIиз лайихлу хьанвай дагъус­танви кьегьалрин пара гуьрчег ва кьетIен шикилар эцигнава.

Ставрополдин крайда республикадин векил Абдула Омарова лагьайвал, выставкадин кьилин макьсад агьалийриз игитрин гьакъиндай малуматар гун ва абур жегьил несилрин рикIел аламукьдайвал авун я. Дагъустанвийрин жуьрэтлувал, уьтквемвал тешпигь авачирди я. Гьавиляй уьлкведин Президентди абуру Ватандин итижар хуьн патал ийизвай гьерекат­риз дуьзгуьн къиметни гузва.

Уьлкве патал женг чIугвазвай, чанар къурбанд ийизвай игитар чир хьун, абур рикIел хуьн, абуруз гьуьр­мет авун гьар садан буржи я. Абур акьалтзавай несилар патални хъсан чешне я.

Выставкадин тамашачийри игитрин галерея арадал гъуниз хъсан къимет гузва.

Абад  Азадов