Студентриз талукь кьезилвал
Гзаф аялар авай хизанривай аялри колледжра ва я техникумра кIелунай гайи гьакъийрин пай эвез яз вахчуз жеда. Ихьтин малумат чаз РД-дин МФЦ-дин кьилин идарадин пешекарри гана.
Къейдзавайвал, 3-4 аял авай хизанривай гьакъидин 20 % вахчуз жеда, 5 ва адалай гзаф аялар авай хизанривай – 30 %.
Эвездин такьатар вахчунин патахъай арза диде-бубадикай садавай ва я студентдин къаюмдивай вугуз жеда. Арза кьабулунин шартIар ихьтинбур я:
– хизанда авай ксарал гьалтзавай юкьван къазанжи регионда тайинарнавай яшамиш хьунин агъа кIанин кьадардилай артух тушиз хьайитIа;
– аялди очный къайдада ва гьакъидихъ кIелзаватIа;
– хизанда 18 йисан яшарив агакь тавунвай пуд ва я адалай гзаф аялар аваз хьайитIа;
– тамам яшдив агакьнавай, очный къайдада кIелзавай, эвленмиш тахьанвай студентар патал эвездин такьатар вахчудай ихтияр 23 йис тамам жедалди къуватда жезва.
Арза вугун патал МФЦ-диз фидайла ихьтин документар кьун герек я: гзаф аялар авай хизан я лагьай шагьадатнама, диде-бубадин ва аялдин паспорт, вири аялрин дидедиз хьайивилин гьакъиндай шагьадатнамаяр, пулунихъ кIелзавайвилин икьрар, кIелзавай идарадай справка, арзачидин банкунин реквизитар (диде-бубадикай садан).
И къуллугъ Дагъустандин МФЦ-дин вири филиалра кьилиз акъудзава.
"Лезги газет"