Сагърай лугьузва
ДГПУ-дин филологиядин факультет вуз арадал атай 1943-йисалай кардик ква. Алай вахтунда факультетдиз чи гьуьрметлу ватанэгьли, филологиядин илимрин доктор, алим Руслан Гьажимурадович Къадимова регьбервал гузва.
Алай йисан гатуз, кIелунин цIийи йисан вилик, факультетдин уьмуьрда лишанлу вакъиа кьиле фена: университетдин дараматда филологиядин факультет авай гьаваяр цIийикIа туькIуьр хъувуна. Ремонтдин кIвалахар кьиле тухудайла, рак-дакIардилай гатIунна, чимивал гудай къурулушдал къведалди, – вири цIийи хъувуна.
Факультетдин коллектив, ина чирвилер къачузвай студентар патал и кIвалах цIуд йисаралди вилив хуьзвай лишанлу вакъиадиз элкъвена. Исятда факультетдин цIийи къаматди вири гьейранарзава. Ина тарсар гузвай муаллимри, студентри хайи вуз авадан авунин кьиле акъвазай виликан ректор Нариман Асварович Асвароваз сагърай лугьузва.
Филологиядин факультетда тарсар гузвай муаллимри къейдзавайвал, вуздин кьиле Нариман Асваров тайинарайдалай инихъ чирвилерин маканда хъсан патахъ хейлин дегишвилер кьиле фена. Кар алакьдай пешекар, тешкилатчи Нариман Асваров себеб яз, са куьруь вахтунда ДГПУ-да гьам кIелунрин, гьам илимдин, гьамни вуздин дараматар цIийикIа туькIуьр хъувунин рекьерай хъсан патахъ хейлин дегишвилер кьиле фена.
Мукьвара ДГПУ-дин ректор дегиш хьана: РФ-дин просвещенидин министерстводин приказдалди и къуллугъдал РД-дин Гьукуматдин Председателдин заместитель яз кIвалахай Муслим Телякавов тайинарнава. Университетдин коллективди Муслим Пашаевича виликан ректорди кутур хъсан адетар давамардайдак ва вуз мадни вилик тухуз алахъдайдак умудар кутунва.
Чи мухбир