26-июлдиз республикадин шегьерранни районра Дагъустандин Конституциядин йикъаз талукьарнавай мярекатар кьиле фена. Абурукай кьилинбур Махачкъалада тешкилнавай.

«Лезги газетдиз» РД-дин Кьилин пресс-къуллугъди хабар гайивал, и юкъуз­ Фёдор Щукина са жерге муаллимрив, здравоохраненидин ва медениятдин хилен къуллугъчийрив гьукуматдин шабагьар вахкана. Региондин регьберди, вири дагъустанвийриз Конституциядин югъ мубарак авуналди, хайи республика вилик финик лайихлу пай кутазвай муаллимрин, духтуррин, медениятдин идарай­рин векилрин гьакъисагъ зегьмет къейдна, халкьдиз намуслувилелди къуллугъ авунай абуруз сагърай лагьана.

26-июлдиз РД-дин са жерге минис­терствойрини Конституциядин йикъаз та­лукьарнавай жуьреба-жуьре серенжемар тешкилнавай. Мисал яз, медениятдин министерстводи кьиле тухвай флешмобда саки ирид агъзур касди иштиракна. Флешмобдин сергьят­ра аваз элкъвей столар, жуьреба-жуьре сеняткарвилерай мастер-клас­сар, концертар ва маса мярекатар кьиле фена.

РД-дин Конституциядин йикъаз талукьарнавай кьилин мярекат суварин концерт тир. РД-дин медениятдин министерстводин пресс-къуллугъдин делилралди, ана ругуд агъзурдав агакьна инсанри иштиракна. Мярекатдин иштиракчийрин вилик республикадин гьукумдин кьиле авайбурун патай тебрикдин гафар гваз РД-дин Гьукуматдин Председателдин сад лагьай заместителдин везифаяр вахтуналди тамамарзавай Рамазан Жафаров рахана. 

Чи мухбир