«Лезги газетдин» редакциядихъ галаз саки 70 йисуз датIана алакъаяр хуьзвай авторар са акьван пара авач. Абурукай сад Хив райондин Цналрин хуьряй тир Рамазан Велибегов я.
Ам муаллим-тарихчи я. Хейлин йисара мектебда муаллим, завуч, директор яз зегьмет чIугуна, цIудралди несилриз чирвилерни тербия гана. Жуьреба-жуьре йисара хуьруьн Советдин председателдин, «Сафаралиевский» совхоздин директордин везифаяр тамамарна.
Республикадин жуьреба-жуьре газетрин, журналрин редакцийрихъ галаз ада 1956-йисалай инихъ алакъаяр хуьзва. Къенин юкъуз ам са шумуд ктабдин, жуьреба-жуьре темайрай кхьенвай вишералди макъалайрин, очеркрин автор я. Рамазан Велибегова вичин кIвалахра асул фикир тарихдин месэлайриз гузва, кIелзавайбуруз хайи чил, Ватан хуьниз, багъри ерияр рикIелай алуд тавуниз эвер гузва.
Мукьвара Рамазан Велибегов «Лезги газетдин» редакциядиз мугьман хьанвай. Кьилин редактор Мегьамед Ибрагьимовахъ галаз кьиле фейи гуьруьшдал ада вичи исятда тарихдин нубатдин ктабдин винел кIвалахзавайди къейдна ва адав хайи газет патал кхьенвай са шумуд макъала вахкана.
Гуьруьшдин эхирдай М. Ибрагьимова яргъал йисара «Лезги газетдин» редакциядихъ галаз алакъаяр хуьнай, лезги чIал, эдебият, публицистика вилик тухуник чIехи пай кутунай Рамазан Велибеговав «Лезги газет» — 100 йис» медаль шад гьалара вахкана, адахъ чандин сагъвал, яргъи уьмуьр, кIвалахда мадни еке агалкьунар хьун алхишна.
Агьмед Магьмудов
