2025-йисан январь-ноябрь варцара Дагъустанда гьялнавай балугърин кьадар, алатай йисан гьа и вахтунив гекъигайла, саки кьве сеферда гзаф хьанва ва, идалай вилик йисуз 3,5 агъзур тонндин делилдив агакьнавайтIа, алай йисуз адан кьадар 7 агъзур тонндиз барабар я. Идакай РД-дин балугъчивилин майишатдин рекьяй комитетди хабар гузва.
Алай йисуз гьялнавай балугъдин умуми кьадардикай 6 агъзур тонн регионда гьасилнавай ва кьунвай балугърал гьалтзава. Мад са тонн балугъар республикадин Россиядин Федерациядин маса субъектрай гъана. Гекъигун патал, 2024-йисан январь-ноябрь варцара Дагъустанда 3,38 агъзур тонн – чкадин ва 121 тонн къецепатай гъанвай балугъар гьялнай.
Республикада гьялзавай балугърин жуьрейрик лацу амур, жерех, толстолобик, адетдин килька, селедка, шемая ва сазан акатзава. Дагъустандин карханайри са кьадар жуьре суьрсет гьазурзава, гьа гьисабдай яз ртIанвай, тIимил кьелкутунвай ва кьурурнавай, дериндай муркIада тунвай балугъар ва консервияр. Асул гьисабдай и метягь Москвадин, Санкт-Петербургдин, Краснодардин ва Ставрополдин крайрин базарра маса гузва. Идаради гъавурда твазвайвал, республикада гьялзавай суьрсетдин кьадар гзаф хьун муьштерийрин, гьа жергедай яз туристрин патай адан игьтияж гзаф хьунихъ галаз алакъалу я.
Хабар гузвайвал, алай йисан эхирдалди «Каспий рыба» ООО-ди Къизляр районда эцигнавай балугъ тамамдаказ гьялдай завод кардик кутадайвал я – ада гзаф кьадар жуьрейрин балугърикай консервияр гьазурда. Алай вахтунда компанияди кьурурнавай балугъ, махсус жуьреда атIанвай суьрсет (филе, стейк), гьакIни маса жуьре метягь гьазурзава. Дагъустанда гьасилзавай балугъ ва куьр мукьвал тир къецепатан уьлквейризни маса гузва. 2025-йисуз виридалайни гзаф суьрсет республикади Азербайжандиз маса гана — тахминан 229 тонн сазан, тахминан 100 тонн лещ, 60 тонндив агакьна жерех ва икI мад. Балугъчивилин майишатдин хейлин кьадар суьрсет Узбекистандизни рекье туна.
Амина Муслимова
