2-октябрдиз Махачкъалада, Иса пайгъамбардин (алейгьи салям) тIварунихъ галай руьгьдин центрада “Лезги халкьдин садвилин межлис” лишандик кваз чIехи мярекат кьиле фена. Къейд ийин хьи, ихьтин мярекатар тIвар кьунвай центрада вилик йисарани тухванай.
РД-дин Муфтиятди тешкилнавай межлисда лезги халкьдин машгьур векилри — алимри, сиясатчийри, спортсменри, карчийри, журналистри ва масабуру иштиракна. Абурун арада РД-дин туризмдин ва халкьдин художественный сенятрин министерстводин регьбер Э.Мерданов, РД-дин Халкьдин Собранидин депутат М.Алиханов, Кьиблепатан Дагъустандин са жерге районрин кьилерин заместителар, РД-дин милли сиясатдин ва динрин крарин рекьяй министрдин заместитель М.Шафиев, Кьиблепатан Дагъустанда РД-дин муфтийдин патай тамам ихтиярар ганвай векил Гь.Гьажиев, Муфтиятдин векил Ш.Алиханов, Махачкъала шегьердин депутатрин Собранидин председателдин сад лагьай заместитель Х.Алиев ва масабур авай.
Межлисдал рахайбуру лезги халкьдин тарихдикай, адан баркаллу векилрикай, лезгийри халкьарин арада дуствал, стхавал хуьник кутазвай паюникай ихтилатар авуна. Жемиятдин векил Сулейман Тагъибегова машгьур шейх, дагъвийрин руьгьдин буба Ярагъ Мегьамедан уьмуьрдин ва диндин рекьикай гегьенш доклад авуна. Мярекатдал лагьай нашидар кIватI хьанвайбуру хушдиз кьабулна. Иштиракчийрин арада умрадиз фидай са путевкани къугъвана.
Лагьана кIанда, алатай йисарив гекъигайтIа, цIинин межлис са акьван хъсандиз тешкилнавачир. Сад лагьайди, атанвай инсанрин кьадар тIимил тир. Мугьманрин арада республикадин государстводин органра кIвалахзавай лезги халкьдин векиларни тIимил авай. Виликан йисарив гекъигайтIа, мярекатдин программани кесиб тир. Тешкиллувилин жигьетдайни рехъ ганвай гъалатIар авай. Мисал яз, гаф гун патал межлисдиз теклифнавай мугьманриз сегьнедал экъечIдай мумкинвал ганвачир. Лезги халкьдин садвилин межлисдин кьиле акъвазнавайдини маса халкьдин векил тир. Нубатдин сеферда тешкилатчийри и крариз фикир гудайдак умудар кутазва.
Агьмед Магьмудов
