Росреестрди чилин участокрихъ галаз алакъалу икьраррин алай йисан 1-мартдилай къуватда гьатнавай цIийи къайдадикай малуматар гана.

Эгер ЕГРН-да чилин участокдин час­парар алай чкайрикай малуматар авач­тIа, ам регистрация авунин крар тамамариз жедач. ГьакIни часпарар тайинар тавунвай участок кадастрдин учетда эцигиз ва я юзан тийидай объектдин ихтиярар тестикьариз жедач.

ЦIийи къайдади чилин участокрин цIийи сагьибрин ихтияррин заминвал таъ­минарзава, абур мумкин тир четин месэлайрикай хуьзва.

Къейдзавайвал, ЕГРН-да чилин учас­токдин часпарар аваз хьун ва я тахьун Росреестрдин кадастрдин ачух картадай ахтармишиз жеда. Идалайни гъейри, ­часпарар алай чкайрикай ЕГРН-дин выпискада малуматар къалурзава. ТIвар кьунвай выписка МФЦ-дай ва я «Госкъуллугъар» порталдин куьмекдалди къачуз жеда.

Арзаяр кьабулзава

1-апрелдилай инвалид аялар ва I груп­падин инвалидар яшамиш жедай кIва­­ле­ралди таъминарунин гьакъиндай ар­за­яр кьабулзава. РД-дин Гьукуматдин 2019-йисан 22-майдин 112-нумрадин къарарда къалурнавай­вал, государстводин куьмекдин прог­раммадин макьсад яшайишдин шартIар хъсанарунин игьтияж авай, чпин мумкинвилерал сергьят алай агьалийриз яша­йишдин къулайвилер арадал гъун я.

Госпрограммадай пулунин такьатар своддин сиягьда авай ватандашриз гузва. МФЦ-да арза вугудайла, ихьтин документар чарасуз я:

 арзачидин ва адан хизанэгьлийрин паспортар (14 йисан яшдив агакь тавунвай аялрин шагьадатнамаяр);

 эвленмиш хьайивилин ва я чара хьайивилин гьакъиндай къарар;

 МСЭ-дин (медико-социальный экспертиза) справка;

 хсуси такьатар къалурнавай лицевой счетдай выписка;

 ипотекадин кредит гуз хьунин мумкинвал авайвилин гьакъиндай банкунин къарардай выписка;

 дидевилин капиталдин сертификат;

 субсидия къачудайбурун учетда эцигнавайвилин гьакъиндай админист­рациядай къарар (справка).

МФЦ-дин пешекарри хабар гайивал, субсидия къачудайдан хсуси такьатар 750 агъзур манатдилай тIимил хьун лазим я.

И къуллугъ пулсуздаказ кьилиз акъудзава. Эгер суалар аватIа, МФЦ-дин идарадиз зенгиз жеда.

«Лезги газет»