14-ноябрдиз Мегьарамдхуьруьн районда Кьиблепатан Да­гъустандин мектебрин 9-класс­ра кIелзавай ва чпихъ лезги чIалал шиирар кхьидай алакьунар авай аялрин арада конкурс кьиле фена. Ана СтIал Сулейманан, Кьурагь, Мегьарамдхуьруьн ва Докъузпара районрай санлай къачурла 41 аялди иштиракна. Вучиз ятIани, Ахцегь райондай конкурсдиз са аялни атанвачир­. СтIал Сулейманан ва Кьурагь районрай анжах са-са аялди иштиракна.

Гьар йисуз мергьяматлу «Леки» фондуни, «Лезги газетдин» редакцияди ва ФЛНКА-ди тешкилзавай и мярекат цIи Мегьарамдхуьруьн райондин администрациядин куьмекдалди кьиле фена.

Иштиракчийрин вилик са шартI эцигнавай: сегьнедал экъечIна жува кхьенвай шиир фасагьатдиз хуралай кIелун. Жюридин членри и еридилай гъейри, къиметар гудайла аялрин алукIунриз (милли парталар алайбуруз баллар артухарзавай) ва шиир кIелдайла ийизвай гьерекат­ризни фикир гана. Жюридин членрин арада писателар тир Максим Алимовни Сардар Абил, «Лезги газетдин» кьилин редактор Мегьамед Ибрагьимов ва «Вахтар ва инсанар» передача кьиле тухузвай Владик Батманов авай.

Конкурсдин нетижада 1-чка - Мегьарамдхуьруьн райондин Тагьирхуьруьн мектебдин ученица Алина Велиметовади, 2-чка – Докъузпара райондин Усугъчай хуьруьн мектебда кIелзавай Къемер Мусаевади ва 3-чка Мегьарамдхуьруьн райондин ЦIийи Филерин мектебдин ученик Ибрагьим Улубегова кьуна.

Гъалибчийриз дипломар, ктабар ва 15, 10, 5 агъзур манатдин кьадарда аваз пулдин пишкешар гана. 4-14-чкаяр кьур аяларни дипломралдини 3 агъзур манатдин кьадарда аваз пулдин пишкешралди къейдна. Амай вири иштиракчийриз дипломар ва 1 агъзур манатдин кьадарда аваз пулдин пишкешар гана.

Шабагьар вахкунин мярекатда­ «Леки» фондунин векилар тир Максим Садикьовани Руслан Мегь­диханова ва газетдин кьилин редактор Мегьамед Ибрагьимова иштиракна. Тешкилатчийри конкурс кьиле тухунин карда куьмекар гайи Мегьарамдхуьруьн райондин администрациядин медениятдин управленидин кьил Эседуллагь Селимоваз сагърай лагьана.

Агьмед  Магьмудов