Амирасланов Гьажичуьнгуьт Татархан хуьре лежбердин хизанда дидедиз хьана. Ада Кьурагь райондин КьепIиррин школада, ахпа Бакуда авай ими Рамазан Керимован кIвале яшамиш жез, гьана кIелун давамарна. Мектеб агалкьунралди куьтягьай жегьил Азербайжандин КцIар шегьерда авай военный училищедик экечIна. Анаг куьтягьдалди Гьажичуьнгуьт Яру Армиядин жергейриз тухванай.
Ватандин ЧIехи дяве башламишайла, аскер фронтдиз рекье туна. Гь. Амираслановаз Сталинград патал кьиле фейи къизгъин женгера иштиракун кьисмет хьана. Са шумудра залан хирер хьайи ам, сагъ хъхьайла, элкъвена фронтдиз хъфенай.
Женгера къалурай кьегьалвилерай Гьажичуьнгуьт Амирасланов Ватандин дяведин ордендиз, “Сталинград хуьнай”, “Германиядин винел гъалибвал къазанмишунай” медалриз лайихлу хьана.
Ватандин дяведилай кьулухъ Гьажичуьнгуьт Амирасланов старший лейтенантдин чинда аваз хайи хуьруьз хтанай. 1946-йисалай жегьилди Татархан хуьруьн 7 йисан школада математикадинни физикадин тарсар гуз башламишна. Гуьгъуьнлай ада Цмуррин 7 йисан мектебда завучвиле кIвалахна. 43 йисан вахтунда ада акьалтзавай несилдиз математикадай, физикадай чирвилер гана. Чидайбуру ам тIебии алакьунар, зигьин, бажарагъ авай муаллим тир лугьудай. Ада вичин везифаяр намуслувилелди кьиле тухудай, жемятдин патай адаз еке гьуьрмет авай.
Гьажичуьнгуьт Амирасланова уьмуьрдин юлдашдихъ галаз санал 5 хвани 2 руш тербияламишна. Адан рухвайри яшайишдин гьар са хиле алакьунар авай регьберар, пешекарар яз кIвалахзава.
Алай вахтунда ветерандин чешнелу кIвалах адан хтул Гуьлнара Амираслановади давамарзава. Гуьлнаради, ДГУ-дин математикадин факультет акьалтIарна, Птидхуьруьн мектебда вичин пешедай тарсар гузва.
Вири уьмуьр акьалтзавай несилдиз бахшай, Ватандин ЧIехи дяведа кьегьалвилер къалурай Гьажичуьнгуьт Амирасланов адан невейрин, ам чидайбурун рикIера гьамишалугъ яз амукьда.
Имирчубан Бабаев
