“Урбанфест”
23-июлдиз Дербент шегьердиз мугьман хьайи Дагъустан Республикадин Кьил Рамазан Абдулатипов “Урбанфест” фестивалдин сергьятра аваз арт-объектриз килигна.
Региондин кьилин иштираквал аваз сифте Дербентдин къеледин кеферпатан цлан патав килигунрин майдан ачухунин мярекат кьиле фена. И майдандилай Нарын-къеле хъсандиз аквазва. ЦIийиз ачухай и майдандал жуьреба-жуьре шикилар чIугунай мастер-класс тешкилна ва Рамазан Абдулатипова жаван художникрихъ галаз суьгьбетарна.
Шегьердин кьилин майдандал Рамазан Абдулатипова “Урбанфест” фестиваль агалунин шад мярекатдал вири иштиракчияр тебрикна, дагъустанвийриз алай аямдин яратмишунрин технологияр чирунай абуруз сагърай лагьана.
— Эхиримжи йисара Дербент патал гзаф кIвалахар авунва. Дербентвияр цIийи къайдада яшамиш жез башламишна. Ам цIийи шегьер хьанва. Государстводилай, мэриядилай ва гьар жуьредин фондарилай гъейри шегьердиз шегьерэгьлийрин чпин рафтарвилер важиблу я. Дербент — им Россияда вичел фикир желбзавай шегьеррикай сад я. Ам генани акI туькIуьрун герек я хьи, дуьньяда вичел виридалайни гзаф фикир желбзавай чкадиз элкъведайвал. Шегьердин тIвар-чин хуьн ва мугьманар чи культурадихъ галаз танишарун важиблу я, — къейдна республикадин Кьили.
Ахпа фестивалдин иштиракчийри чпин проектрин презентация авуна.
Архитектурадин гъвечIи жуьреяр ва шегьер къулай авунин маса шейэр магьалра, гьуьлуьн къерехда, Гагаринан тIварунихъ галай куьчеда ва Азадвилин майдандал эцигда.
Фестивалдин сергьятра аваз Россиядин гьар жуьре шегьеррай атанвай 30 жегьил архитекторди шегьерэгьлийрихъ галаз санал туькIуьрай архитектурадин объектар къадим Цитаделдин кьуд майдандал эцигнава. Гьар са майдандин гьакъиндай паталай атанвай пешекардин (тьютор) регьбервилик квай дестеди жаваб гузва. Тьюторрин арада Махачкъаладай, Санкт-Петербургдай ва Москвадай атанвай архитекторарни ава.
Мярекатдин тешкилатчияр мергьяматлувилин “Пери” фонд, Москвадин архитектурадин Марш-лаб лаборатория, Дербентдин мэрия ва “Дербентда I Петрдин кIвал” — музейдин комплекс тир.
Н.Генжевидин багъда
Низами Генжевидин тIварунихъ галай багъ Дербент шегьерда виридалайни екеди я. Адан сергьятра шегьердин куьгьне цлан амукьаяр, куьгьне маяк ва шаирдин гуьмбет ава.
Республикадин Кьил Р.Абдулатипова и багъда сейрна, куьруь вахтунда ам къайдадиз хкунин тапшуругъар гана ва проектризни цIийикIа туькIуьр хъувуниз (реконструкциядиз) такьатар жагъурдайди хиве кьуна.
— Жуван тарихдив икI эгечIун дуьз туш! Им шегьердин лишанрикай сад я. Дербентдин къацу чкайрикай сад тир ина шегьерэгьлийри са мус ятIани ял язавай. Багъдиз гьа виликрай хьтин машгьурвал хгун, ам къулай авун важиблу я, — къейдна Рамазан Абдулатипова.
Гуьгъуьнлай региондин Кьил чкIизвай кIвалерай агьалияр куьчарунин программадай Буйнакскийдин ва Ленинан тIварарихъ галай куьчейра эцигзавай кIвалериз килигна. Санлай къачурла, Рамазан Абдулатипов эцигунрилай рази яз амукьна, бязи нукьсанар туькIуьр хъувун патал тайин тапшуругъарни гана.
РД-дин Кьилин ва Гьукуматдин пресс-къуллугъ
