РД-дин хуьруьн майишатдин ва  недай суьрсетдин министр­дин везифаяр вахтуналди тамамарзавай  Иван Голуба  и йи­къара хуьруьн майишатдин тайинвал авай чилерал  гуьзчивал авунин месэлайриз талукь  совещание кьиле тухвана. Мярекатда гьакIни РД-дин вице-премьердин везифаяр вахтуналди тамамарзавай Альберт Хасауова, Россельхознадзордин РД-да авай управленидин регьбер Шахрудин Гунашева ва маса пешекарри иштиракна.

Совещанидин иштиракчийри кьетIен фикир чилерин законодательстводин истемишунрал амал авунин ва  хуьруьн майи­шатдин мулкар тайин макьсаддалди ишлемишунин месэлайриз гана.

Закондин бинедаллаз, хуьруьн майишатдин хиле ишлемиш­завай участокар патал чилерин налогдин кьезилвилер авай ставка – 0,3 процент фикирда кьунва. Гьа са вахтунда муниципалитетра авай чилерал гуьзчивал авуни къалурзавайвал,  са жерге  участокра  хуьруьн майишатдин кIвалахар гьакъикъатда кьиле тухузвач.

Къейдзавайвал, 2025-2026-йисара  ахтармишунин кIвала­хар тахминан 400 агъзур гектарда тамамарна. Нетижада  къайда чIурнавай 372  дуьшуьш винел акъудна.  Налогрин органриз  чилелай къачузвай налогдин кьадар 0,3 процентдилай 1,5 процентдив агакьдалди хкажунин (законда къалурнавай дуьшуьш­ра) гьакъиндай 28 арза рекье тунва.

И.Голуба хабар гайивал, РД-дин хуьруьн майишатдин ва недай суьрсетдин министерстводи, республикадин   чилерин ва эменнидин алакъайрин министерстводихъ ва гуьзчивалдай органрихъ галаз санал хуьруьн майишатдин чилер ишлемишунин нетижалувал хкажунихъ ва и рекье закондин истемишунар кьилиз акъудунихъ элкъуьрнавай  кIвалахар давамарзава.

Жасмина Саидова