Сентябрдин юкьвара сечкияр кьиле физвай чIавуз заз Кас­пийск шегьерда РФ-дин Игит Нурмегьамед Гьажимегьамедо­ван тIварцIихъ галай 14-нумра­дин лицейдин муаллимрихъ га­лаз мукьувай таниш жедай мумкинвал хьана. Ина сечкийрин 0616-нумрадин участок авай ва чкадин муаллимрихъ галаз санал зунни комиссиядик квай. Таниш хьайи сифте декьикьайрилай за лицейдин муаллимрин коллективдин арада еке гьуьр­мет авайди кьатIана. Зун абур чпин пешедив, чирвилер гузвай сухтайрив рикI гваз эгечIзавай пешекарар тирдахъ инанмиш хьана. Мад са кар: ина чирвилер къачузвай аялрин диде-бубайри активнидаказ сечкийра иштиракзавай. Зи фикирдалди, и делилди муаллимринни диде-бубайрин арада хъсан алакъаяр авайди, сада-садан меслятар, эвер гунар гьисаба кьазвайди къалурзава.

Заз малум хьайивал, лицейда муаллимри диде-бубайрин иштираквал аваз жуьреба-жуь­ре мярекатар, серенжемар тешкилзава. Абурукай сад – Украинада кьиле физвай махсус серенжемда иштиракзавай аскерриз жуьреба-жуьре герек шейэр рекье тун. Директордин замес­титель Асия Юсуповадини вожатый Ли­занат Къафланова­ди кьил кутур и серенжемда «Память гор» тешкилатдин Кас­пийск шегьерда кардик квай отделенидин председатель, дяведин гьерекатрин иштиракчи, запасда авай офицер Тамирлан Феталиева, адан заместитель, дяведин гьерекатрин иштиракчи Мурад Османова, «Движение первых», «Юнармия» гьерекатрин активистри, жемиятдин векил, лезги дишегьлийрин Советдин член Марият Саидовади, лицейда кIелзавай аялри ва масабуру иштиракна. 

Лицейдай  СВО-дин  зона­диз­ рекье тур гьар са посылка еке къайгъударвилелди, рикIин гьис­­сералди гьазурна. АкI тир хьи, муаллимри, аялри посылкайрихъ­ галаз санал аскерриз­ чпин патай чими саламарни ре­кье туна. Гьакъикъатдани, хайи маканрай агакьзавай гьар са затIуни Ватан хуьзвайбурук руьгь кутазва. Къуй дяведин гьерекатар фад куьтягь хьурай ва гьар са ватанэгьли чпин хизанрин патав сагъ-саламатдиз  хтурай!

Чи  мухбир