Дагъустандин Гьукуматди республикадин халкьарин чIаларал текстеринни аудиокхьинрин рекъемрин ктабхана арадал гъуниз резервдин фондунай 15 миллион манат пул чара авунва. Идакай «Лезги газетдиз» РД-дин Гьукуматдин пресс-къуллугъди хабар гана.

Такьатар РД-дин рекъемрин рекьяй вилик финин, информациядин ва печатдин министерстводиз рекье твадайвал я. Алай вахтунда А. Тахо-Годидин тIварцIихъ галай Дагъустандин педагогикадин илимдинни ахтармишунрин институтди урус чIалай Дагъустандин (авар, дарги, къумукь, лезги, лак ва табасаран) чIалариз 50 агъзур предложение таржума авун патал пешекаррикай ибарат дестеяр арадал гъанва. Идалайни гъейри, информациядин материалрин сесер кхьин ва махсус техплатформаяр арадал гъун фикирдиз къачунва.

Проектдин и пай акьалтIарайдалай кьулухъ РД-дин рекъемрин рекьяй вилик финин, информациядин ва печатдин министерство государстводин ва муниципальный къуллугърин сад тир порталдиз милли чIалар акъудунин кардив эгечIда.