31-августдиз Россияда ветеринариядин къуллугъчидин югъ къейдна. Халкьдин­ майишатда четин пеше яз гьисабзавай­ гьайванрин духтурвал суваб авай, мергьяматлу кеспи яз чизва инсаниятдиз. Мадни лугьуз жеда хьи, ам виридалай­ни важиблу пешени я. Важиблувал, кье­тlенвал И.П. Пирогова икl къейднай: «Медицинади инсандин сагъламвал хуьзва, ветеринарияди – инсаниятдин».

Вири Россияда хьиз, Кьурагь райондин ветеринариядин кьуллугьчийрини чпин пешекарвилин сувар – ветеринариядин къуллугъчидин югъ – шад гьалара къейдна.

Шадвилер управленидин дараматда и йикъаз талукьарнавай совещани­дилай га­тlун­на. Коллективдин вилик тебрикдин келимаяр райондин ветуп­равленидин начальник Надир Асланова лагьана, ам авунвай ва вилик кумай кlва­лахрикай, агалкьунрикай ра­ха­на. «Ветеринариядин къуллугъдин­ гьуьр­­метлу работникар! За квез пеше­­карвилин­ сувар рикӀин сидкьидай­ му­баракзава­. Куьне гьар йикъан зегь­мет­далди,­ гьайванрин сагъламви­лин гьа­къиндай­ къай­гъударвал чӀугу­нал­ди, абурукай­ къа­­чузвай суьрсетдал­ гуьзчи­вал тухуналди, инсанрин сагъламвилин къара­вулда акъвазуналди, агьали­яр гьайван­рикай акатзавай азаррикай хуьзва.Чи райондин агьалийри еке карч алай 13 195  гьайван, 37 685 лапаг, 580 балкlан ва жуьреба-жуьре маса гьайванар хуьзва. Абурун сагъламвилин къаравулда кьилин ва юкьван пешекарвилин чирвилер авай, кӀвалахдиз вафалу, агалкьунралди тафаватлу жезвай 24 духтур акъваз­нава. Куьне куь хиве авай везифаяр кьилиз акъудзава. Гьавиляй къе чи райондин ветеринариядин управление республикадин дережада вилик жергейра ава.

Лагьана кlанда хьи, алай вахтунда кlва­лахда чал гзаф четинвилер гьалтзава. Сад лагьайди, чи духтуррин юкьван яш 60 йис я. Жегьилар гьайванрин духтурдин пешекар­вал къачуз физвач. Чи идарадиз эхиримжи­ жегьил пешекар 2019-йисуз хтанва. Кьвед лагьай четинвал ам я хьи, гьайванрин иесийри, чи гъавурда акьан тийиз, рапар ядайла, иви къачудайла, гьайванар кьуникай кьил къакъудзава. Гьайванар нехирдив кас гвачиз, чпин ихтиярда аваз ахъайнава бязи хуьрера…

Ветеринарвал гьайванрал рикӀ алай, абурун къадир авай, гьамиша абуруз куьмекдиз физ гьазур, мергьямат­лу, кьетlен инсанрин пеше я. Заз квехъ сагъламвал, мублагьвал, хизандин къулан чимивал, кӀва­лахда инлай кьулухъни агалкьунар хьана кӀанзава», – лагьана ветуправленидин начальникди.

Гуьгъуьнлай ада зегьметда тафаватлу жезвай работникрин тӀварар кьуна: Кьепlир­рин ветпунктунин духтурар тир Рагьимов Аслан, Эмирханов Рагьимхан, Саидов Абдулкерим, Аладашдин  кьиле Апаев Рамазан авай ветлечебницадин коллектив, ветуправленидин кьилин духтур Сефералиев Мавлудин ва масабур. Надир Асланова бязи работникар чпин гьакъисагъ зегьметдай са вацран мажибдин кьадарда­ аваз премиядиз лайихлу хьанвайди малумарна.

Коллективдив и юкъуз мад са шад хабар агакьна: республикадин Кьилин къарардалди «РД-дин ветеринариядин лайихлу духтур» тlвар ганвай кьве касдикай сад чи райондин Аладашдин ветлечебницадин заведующий Апаев Рамазан я.

Гьайванрин духтурриз тебрикдин­ гафар атанвай администрациядин векилри ва маса идарайрин къуллугъчийрини лагьана. Рахай работникри, чпи къачузвай гъвечlи мажибризни, кӀва­лахда гьалтзавай четинвилеризни, улакь авачиз, кьвед-пуд хуь­руьз фин-хтунин рекьерин азиятризни ки­лиг тавуна, намуслувилелди зегьмет чlуг­ваз­вайди къейдна.

Сейфудин  Шагьпазов