5-майдиз йикъан сятдин 2-далай кьулухъ Махачкъалада, Керимован тIварцIихъ галай куьчеда, малум тушир ксари полициядин къуллугъчийрал гьужумна. Нетижада къанун-къайда хуьзвай органрин векилрикай кьве кас (27 йис хьанвай Гъазибег Шагьбановни 26 йис хьанвай Ислам Арсланбегов) телеф хьана, кьве кас залан хирер алаз духтурханадив агакьарна. Идалай гъейри, жергедин пуд агьалидални хирер-кьацIар хьанва, абурув вахтунда медицинадин рекьяй куьмек агакьарна.
РД-дин МВД-дин пресс-къуллугъди хабар гузвайвал, полициядин къуллугъчийрал гьужумайбур кьве кас авай. Абур кьведни къанун-къайда хуьдай органрин векилри кьабулай серенжемрин нетижада яна кьена.
Дагъустандин Кьил Сергей Меликова вичин телеграм-каналда хабар гузвайвал, къанлуйри полицейскийрал хабарсуз гьужумна, абурув гвай яракьар къакъудна, абур полициядин улакьда аваз катнавай. Амма абуруз чуьнуьх жедай мумкинвал хьанач. РФ-дин СК-дин РД-да авай Управлениди арадал атанвай дуьшуьшдин гьакъиндай уголовный дело къарагъарнава.
Сергей Меликова полициядин телеф хьайи къуллугъчийрин хизанриз башсагълугъвал гана, Дагъустанда гьалар садавайни пайгардикай хкудиз тежедайди къейдна. Адан гафаралди, и дуьшуьш арадал атунин карда тахсирлу гьар садав кIеви жаза агакьарда.
Чи мухбир
