РД-дин Кьил Сергей Меликован тапшуругъдалди кьиле Гьукуматдин Председатель Абдулмуслим Абдулмуслимов авай Дагъустандин делегация и йикъара Оман Султанатдиз мугьман хьана.
Омандин меркездин аэропортуна дагъустанви мугьманар РФ-дин Президентдин Султанатда авай векил Олег Левинани чкадин алишверишдин министрдин меслятчи Рашид Альрашдиди кьабулна.
Гуьруьшдин вахтунда Р. Альрашдиди Дагъустандин делегациядив чпин уьлкведин регьберрин патай чими саламар агакьарна ва чеб алишверишдин, экономикадин, медениятдин ва яшайишдин маса хилерай Дагъустандихъ галаз амадагвилин алакъаяр хуьз, вилик тухуз гьазур тирдакай хабар гана.
Вичин нубатда А. Абдулмуслимова Оман Султанатдин гьукумдин векилрив Сергей Меликован патай саламар агакьарна ва чеб хушдиз кьабулунай сагърай лагьана.
РД-дин премьер-министрди рикIел хкайвал, апрелдин эхирра Омандин Султан Хейсам бин Тарик аль-Саид Москвадиз мугьман хьанай ва РФ-дин Президент Владимир Путинахъ галаз абуру кьве уьлкведин арада авай алакъаяр мадни мягькемарунин месэлаяр веревирднай. И гуьруьшдилай кьулухъ Россиядин регионрикай Дагъустан Султанатдиз мугьман хьанвай сад лагьайди я. А. Абдулмуслимова хабар гайивал, мугьман хьунин кьилин макьсад яшайишдин жуьреба-жуьре хилера проектар санал кьилиз акъуддай мумкинвилер веревирд авун, вилик фидай цIийи рекьер тайинарун ва амадагвилин алакъаяр мягькемарун я.
Султанатда Дагъустандин делегацияди са шумуд гуьруьш кьиле тухвана. Абурукай гегьеншдиз РД-дин Гьукуматдин сайтдай кIелиз жеда.
Агьмед Магьмудов
