Иесидив ахгакьарна
Махачкъаладин полициядин отделдиз 23 йисан яшда авай чкадин агьали арза ийиз атана: малум тушир касди адан 130 агъзур манат пул авай кисе чуьнуьхна. Адан гафаралди, кисе адавай Махачкъаладин са кинотеатрдин вилик аватна. Квахьнавайдакай хабар хьайила, ам жагъур хъувун геж хьанвай.
Полициядин къуллугъчияр са шумуд юкъуз къекъвена, нетижада пул авай кисе 65 йисан яшда авай шегьердин агьали тир дишегьлидин кIваляй жагъун хъувуна. Малум хьайивал, адаз рекьин къерехда акъвазарнавай машиндин патав чилел алай кисе акуна. КилигайтIа, къене 109 агъзур манат пул авай. Муькуь пул гьиниз фенатIа, гьадан патахъай гъавурда тваз хьанач дишегьлидивай.
РФ-дин УК-дин 158-статьядин 2-паюнай уголовный дело къарагъарнава. Дуван авун давам жезва.
Пиянбур тайинарна
Алатай гьафтеда Дагъустандин госавтоинспекциядин къуллугъчийри пиянвилин лишанар кваз машин гьалай 97 кас дуьздал акъудна ва къанундалди абур машин гьалунивай къерехна.
Абурукай 11 касдиз талукь яз (идалай виликни пиян гьалда аваз машин гьалай дуьшуьш малум тирвиляй) РФ-дин УК-дин 264-статьядай уголовный делояр къарагъарнава.
Госавтоинспекцияди рикIел хкизва: ички хъвана машин гьалун къанунсуз кар я. Ихьтин чIуру гьерекатри мусибатдин дуьшуьшрал гъизва. Гьавиляй жув ва масабур хаталувилик кутамир.
«Лезги газет»
