Алатай гьафтеда Дагъустандин са шумуд шегьерда чпиз гьукуматдин патай гьавая кIвалер чара авуна кIанзавай жегьил 375 хизандив цIийибурун куьлегар вахкуниз талукьарнавай мярекатар кьиле фена.

Лагьана кIанда, 2022-йисалай, РД-дин Кьил Сергей Меликован алахъунар себеб яз, хейлин йисара кIвалер къачун патал нубатра акъвазнавай хизанар цIийибуралди таъминарунин кIвалах виликди фена. Махсус программа цIийи хъувуна, алава такьатар чара авуна, объектар эцигна акьалтIарна. Къизилюрт шегьерда цIийи кIвалерин куьлегар вахкуниз талукьарнавай мярекатда Сергей Меликова иштиракна. «Гьар са хизан патал им тек са кIвал туш, им цIийи уьмуьр, гьакьван геждалди абуру вилив хвейи легьзе я. КIвалер экуьбур, гегьеншбур я. Хизанар патал анра вири къулайвилер ава. Къейд ийин хьи, кIвалерин сагьибрин арада гзаф аялар авай, Украинада кьиле физвай махсус серенжемдин иштиракчийрин хизанарни ава. Къуй абурун кIвалера бахтар, берекат, гьуьрмет хьурай», — кхьенва Сергей Меликова вичин телеграм-каналда.

Агьмед  Магьмудов