Дагъустандин Халкьдин Собранидин 30 йис тамам хьуниз талукьарна, Махачкъалада кьиле фейи шадвилин мярекатдин сергьятра аваз, РД-дин Кьил Сергей Меликова Халкьдин Собранидин са шумуд векилдив гьукуматдин шабагьар вахкана. Шад жедай кар ам я хьи, абурун арада чи кьегьал ватанэгьли, РД-дин Халкьдин Собранидин милли сиясатдин, жемиятдинни диндин тешкилатрин месэлайрин, парламентрин арада алакъайрин рекьяй Комитетдин председатель Фирудин Жамирзеевич Ражабовни ава. С. Меликован Указдалди адаз «Баркаллу зегьметдай» («За доблестный труд») медаль ганва.
Ф.Ж. Ражабова республикадин парламентда кIвалахиз гзаф йисар я. Халкьдин Собранидин депутат яз, ада жуьреба-жуьре къуллугърал кIвалахна, халкьдин, кьилди къачуртIа, вичин хайиди тир Докъузпара райондин жемятдин кар алай месэлаяр гьялуник вичин пайни кутуна.
Эхиримжи йисара Ф.Ж.Ражабова РД-дин Халкьдин Собранидин милли сиясатдин, жемиятдинни диндин тешкилатрин месэлайрин, парламентрин арада алакъайрин рекьяй Комитетдин председатель яз кIвалахзава. Комитетдин кьиле ам акъвазайдалай кьулухъ адан кIвалах аквадайвал вилик фенва. И кардин гьакъиндай Комитетди тешкилзавай мярекатри, кьабулзавай серенжемри шагьидвалзава. Фирудин Жамирзеевичан кIвалахдизни чIехи дережада къимет гуни и кар нубатдин сеферда тестикьарзава.
«Лезги газетдин» редакциядин коллективди Фирудин Жамирзеевичаз нубатдин агалкьун рикIин сидкьидай мубаракзава ва адахъ чандин сагъвал, кIвалахда мадни еке кукIушар муьтIуьгъардай къастарни къуватар хьун алхишзава.
