Спортдин хабарар
Хъсан чешне къалурзава
Вичин ери-бине СтIал Сулейманан райондин Алидхуьрелай тир викIегь кьегьал, спортдин рекье еке агалкьунар къазанмишнавай Аслан Къурбанова, алай вацра спортдин кьве жуьредай вичин къуватар ахтармишуналди ва инанмишвилелди гъалибвилер къазанмишуналди, чун мадни шадарна. ИкI, Россиядин ФСИН-дин директордин ачух Кубок патал Москвада спортдин самбодай акъажунра, гьакIни Татарстандин Елабуга шегьерда, юкьварилай кутIуннавай чIуларикай кьуналди, кьуршахар кьунай итимрин арада кьиле фейи Россиядин чемпионатдани Аслан Къурбанов (90 кг-дин заланвал авайбурун арада) 1-чкадиз лайихлу хьана.
***
Са шумуд югъ идалай вилик Москвада
спортдин самбодай мастеррин арада кьиле фейи ачух турнирда Кьасумхуьрелай тир
Назир Мегьамедрасуловани
98 кг-дилай гзаф заланвал авай спортсменрин арада ада 1-чка кьуна. ЧIехи яшара
авай спортсменрин агалкьунри руьгь кутазвай хьиз, абуру акьалтзавай несилдизни хъсан
чешне къалурзава.
***
И йикъара Казанда Бразилиядин
джиу-джитсудай дуьньядин ачух сад лагьай чемпионат кьиле фена. СтIал Сулейманан райондин Герейханован
хуьряй тир Рагьман Алискерова 70 кг-дин заланвал авайбурун арада къизилдин медаль
къазанмишна.
***
18-октябрдиз Каспийскда, Къ. Къурамегьамедован тIварунихъ галай физкультурадинни сагъламвал мягькемардай комплексда, джиу-джитсудай Дагъустандин чемпионат ва кIвенкIвечивал патал акъажунар акьалтIна. Тамам пуд юкъуз ана республикадин жуьреба-жуьре районрай ва шегьеррай тир саки 300-дав агакьна спортсменри чпин устадвал къалурна. Абурун арада Ахцегь райондин МСШ-да (многофункциональная спортшкола) ва «Экберов ТЕАМ» клубда тренер-насигьатчи, дуьньядин са шумуд сеферда чемпион Эйнар Экберован гъилик вердишвилер къачузвай жаванарни авай. Абурукай са шумуд пишкешдин чкайриз лайихлу хьана.
ИкI, Ислам Айдунбегова (14 йисал
къведалди, 42 кг) – 2, Амир Нагъметулаева (18 йисал къведалди, 81 кг-дилай гзаф),
Жабраил Зугьрабова (14 йисал къведалди, 30 кг), Расул Гьамидова (14 йисал къведалди,
46 кг), Амир Хаспулатова (16 йисал къведалди, 42 кг) ва Карим Жаруллаева (18 йисал
къведалди, 66 кг) 3-чкаяр кьуна.
Рагнеда Рамалданова