15-октябрдиз Дагъустандин Кьил Сергей Меликова кьетIен жуьредин гьаларикай виликамаз хабар гудай ва цIаяр кьунин вилик пад кьадай комиссиядин заседание кьиле тухвана. Идакай «Лезги газетдиз» РД-дин Кьилин Администрациядин ва Гьукуматдин пресс-къуллугъди хабар гана.

Мярекатдин иштиракчийри республикадин муниципалитетра сад тир дежурный диспетчеррин къуллугъар арадал гъуниз ва абур вилик тухуниз, муниципалитетра агьалийриз кьетIен жуьредин гьаларикай виликамаз хабар гудай къурулуш  кардик кутуниз, гьуьле, вацIара, вирера чуьхуьнагар авунин сезон акьалтIуниз талукьарнавай месэлаяр веревирдна.

Къейд ийин хьи, алай йисуз винидихъ тIвар кьунвай комиссиядин 23 заседание кьиле фена, абурукай 21 виликамаз планда къалур тавуна тешкилна.

РикIел хкин, цIи Дагъустандин мулкара цIаяр кьур, инсанар бедбахтвилин гьалара (цIаяр кьунин, це батмиш хьунин нетижада) телеф хьайи дуьшуьшар, гьайиф хьи, тIимил хьанач. Эхиримжибурукай яз, са шумуд югъ идалай вилик Ахвах райондин Карата хуьре администрациядин 2 гьавадикай ибарат  дараматди цIай кьур дуьшуьш къалуриз жеда. Гена инсанриз хасаратвилер хьанач. Талукь идарайри дагъустанвийриз хатасузвилин къайдайрал кIевелай амал авуниз, мукъаятвал хуьниз эвер гузва.

Заседанидин кIвалахдикай гегьеншдиз РД-дин Кьилин сайтдай кIелиз жеда.

Агьмед  Магьмудов