Алатай хемисдиз РД-дин Халкьдин Собранидин сессийрин залда Фёдор­ Щукин Дагъустан Республикадин Кьил яз тестикьарунин мярекат кьиле­ фена. Региондин парламентдин депутатри чинеба сесер гунин нетижада ам республикадин регьбервиле хкяна. 

Важиблу мярекатда СКФО-да РФ-дин Президентдин патай тамам ихтиярар ганвай векил Юрий Чайкади, сенаторри, Кеферпатан Кавказдин регионрин векилри, Госдумадин ва РД-дин Халкьдин Соб­ранидин депутатри, гьукумдин органрин кьиле авайбуру, жемиятдин ва динрин тешкилатрин векилри иштиракна.

Вичин рахунра Юрий Чайкади рикIел хкана хьи, РФ-дин Президент Владимир­ Путина РД-дин кьил яз хкягъун патал­ пуд кандидатура къалурнавай: Да­гъус­тандин парламентда КПРФ фракция­дин регьбер, депутат Самир Абдулхаликьов; РД-дин Халкьдин Собранидин председателдин замес­титель Камил Давдиев; РД-дин Кьилин везифаяр вахтуналди тамамарзавай Фёдор Щукин.

Пуд кандидатдини гележегда респуб­лика еримлу авуниз ва кар алай месэлаяр гьялуниз талукь яз чпин фикирар лагьана. 

Ф. Щукина, республикадин гзаф халкьарикай ибарат агьалийриз вафалувилелди къуллугъ авун, ватандашрин ихтиярар ва азадвал хуьн, Дагъустанда садвал таъминарун вичин буржи тирди малумаруналди, региондин кьилин везифаяр гьакъисагъвилелди тамамарда лагьана, РФ-дин ва РД-дин Конституцийрал кьин кьуна.

Жавабдар къуллугъдал хкягъун мубаракуналди, Юрий Чайкади Ф.Щукина республикадин регьбердин везифаяр вахтуналди тамамарай муддатда ятар акьалтайдалай кьулухъ гьалар пайгардик кухтунин, гуьнгуьна хтунин серенжемар тешкилунин жигьетдай кIвалахар кьилиз акъудайди къейдна.

«Къе регионда кар алайбур тир эконо­микадинни яшайишдин хилера къайдадик кваз цIийивилер тун патал мягькем бине эцигнава. Инвестицияр желбун артухаруниз, гъвечIи ва юкьван бизнесдиз­, хуьруьн майишатдиз ва туризмдиз кьетIен фикир гузва», – къейдна Ю. Чайкади.

Регион вилик тухунин рекье Фёдор Щукина кар алайбур яз гьисабзавай са жерге хилер раижна. Абур чна агъадихъ куьрелди гузва.  

Республикада дяведин махсус серен­жемдин иштиракчияр патал «Дагъларин­ гьунар» программа кьилиз акъуд­зава­, гила «Дагъустандин команда» прог­рам­мадикни кьил кутунва. Лайихлу, алакьунар авай кандидатар хкягъун региондин регьберди вичин гуьзчивилик кутунва.

Республикадин меркездиз шегьер-миллионник дережа гунин ва ам комп­лекснидаказ еримлу авунин программа кьабулунин месэлани кар алайбурукай яз гьисабзава.

Дагълух районарни фикирдай акъуд­дайвал туш. Гьар районда туризмдиз, логистикадиз талукь чкаяр арадал гъида.

Энергетикадин хилекай рахайтIа, къейд авурвал, уьлкведин Президент Владимир Путинахъ галаз хьайи гуьруьшдин нетижада Махачкъалада электросетар дегишарунин ва подстанцияр эцигунин кIвалахриз такьатар ахъаюн тапшурмишна.

Хуьруьн майишатда галаз-галаз гьял­­на кIанзавай месэлаяр ава. Алай аямдин гьамбарханаяр ва шей гьялдай карханаяр эцигун, чкадин шей гьасилзавайбурун тереф хуьн, лежбервилин зегьметдиз гьуьрмет арадал хкун чарасуз я.

Туризм тешкиллуди, къулайди ва хатасуз маршрутар авайди хьун лазим я. Дагълух районра модулдин мугьманлух кIвалер кардик кутун, рекьерин къурулуш хъсанарун важиблу я.

Образованидинни медицинадин мес­­­­элайрикай рахайтIа, «Хуьруьн муал­лим»­, «Хуьруьн духтур» программаяр да­вамарда. Здравоохраненидин сифтегьан хел кар алайди яз гьисабда: цIийи ФАП-ар ва амбулаторияр кардик кутун. ГьакIни аялрин цIийи бахчаяр ва мектебар эцигун давамарда. 

Транспортдин, логистикадин, ме­де­ни­ятдин, спортдин месэлаярни эвелимжибурун жергеда ава. Спортдин комп­лексар, гьавизар, «акьуллу» майданар, медениятдин модулдин кIвалер, ис­кус­ст­войрин мектебар эцигун, сеняткарвилел машгъулбуруз куьмек гун, милли ме­дениятар ва чIалар еримлу авун важиблу я.

Фёдор Щукина дагъустанви карчийриз чпин бизнес Дагъустанда регистрация авуниз эвер гана. И дуьшуьшда абуру гудай налогар республика еримлу авунин рекье серф ийиз жедай.

«Дагъустандин кьил яз хкягъуналди, къе заз еке гьуьрмет авунва. Дагъус­тандин халкьдин вилик за жуван жа­вабдарвал аннамишзава…», – лагьана­ Ф. Щуки­на ва вичел ихьтин жавабдар къуллугъ ихтибар авунай Россиядин Президент Владимир Путиназ чухса­гъул малумарна. 

С. Салимов