Са тIимил йикъар идалай вилик СтIал Сулейманан райондин Вини СтIалрин юкьван мектебда, «Илимдиз кам» лишандик кваз, Кьиблепатан Дагъустандин районрин школайра 5-11-классра кIелзавай аялрин арада математикадай нубатдин сеферда олимпиада кьиле тухвана. Виликан 17 йисуз хьиз, цIини ам меценат, технический илимрин доктор, профессор, Москвадин М.В. Ломоносован тIварунихъ галай госуниверситетдин механикадинни математикадин факультет акьалтIарнавай Абдул Баламирзоеван регьбервилик кваз хъсан тешкиллувал аваз кьиле фена. Вичин макьсад школайра кIелзавай аялрин чирвилерин ери ахтармишун, математикадин илимдиз аялрин патай итиж артухарун, математикадал рикI алай, чпихъ и рекьяй бажарагъ авай аялар майдандиз акъудун, абур руьгьламишун тир и серенжемда цIи СтIал Сулейманан, Ахцегь, Мегьарамдхуьруьн, Кьурагь, Дербент районрай, Дербент, Дагъустандин Огни, Каспийск ва Махачкъала шегьеррай тир 345 аялди чпин алакьунар къалурна.
Къейд авун лазим я хьи, олимпиада тешкилунин кIвалахда куьмекар гайибурун арада Москвадин М.В. Ломоносован тIварунихъ галай госуниверситет акьалтIарнавай Гьабибула Гьабибулаев, ДГПУ-дин информатикадин ва ИКТ-дин кафедрадин доцент Селимхан Агъаханов, ДГУ-дин доцентар тир Максим Ризаев ва Ветлугин Бейбалаев, МАДИ-дин Махачкъаладин филиалдин доцент Даниял Селимханов авай.
Абдул Баламирзоевахъ галаз кьиле фейи суьгьбетдай малум хьайивал, олимпиада тешкилунин ва кьиле тухунин кIвалахда СтIал Сулейманан райондин администрацияди, райондин образованидин управлениди (РУО) ва Вини СтIалрин юкьван мектебдин коллективди (директор — Наргиля Жамиева) еке куьмекар гана. Олимпиададин спонсорар мергьяматлувилин «Умуд» фонд, «Надежда» ЦОД, меценатар Н. Н. Бутаев ва Ш.Н. Назаралиева тир. Олимпиада ачухуниз талукьарнавай мярекатда СтIал Сулейманан райондин администрациядин кьилин везифаяр вахтуналди тамамарзавай Заур Къагьриманова, образованидин управленидин (РУО) начальник Гьуьсейн Шихбабаева, адан заместитель Расул Къагьриманова иштиракна.
Заур Къагьриманова олимпиададин иштиракчийрихъ агалкьунар хьун алхишна, Абдул Баламирзоеваз районда просвещенидин кIвалах кьиле тухунай, бажарагъ авай аялрин руьгь хкажунай, математикадин илим вилик тухуник ва машгьуруник лайихлу пай кутунай сагърай лагьана.
— Куьне кьил кутуналди, яргъал йисара олимпиада кьиле тухуналди, неинки Кьиблепатан Дагъустандин районрин ва шегьеррин, гьакI вири республикадин муаллимрин ва аялрин патайни куьн еке гьуьрметдиз лайихлу хьанва. СтIал Сулейманан районди алимралди, искусстводин ва илимдин деятелралди машгьурвал къазанмишнава. Куь карни чешне къачуниз, дамах авуниз лайихлуди я. Чна квез сагърай лугьузва. Гележегдани чалай алакьдай вири жуьредин куьмекар гун ва проект вилик тухун хиве кьазва, — къейдна Гьуьсейн Шихбабаева.
ЦIи олимпиадада Дербент, Махачкъала шегьеррай, Ахцегь, Кьурагь ва СтIал Сулейманан районрай тир аялри гъалибвал къачуна. Абурукай I дережадин дипломриз ва 5 000 манатдин кьадарда аваз пулдин пишкешдиз 9 аял лайихлу хьана. 16 аялди — 2 ва 15 аялдини 3-чкаяр кьуна. Абуруз 3000 ва 2500 манат пул ва талукь дережадин дипломар гана. Мадни 32 аял грамотаяр ва 1500 манатдин кьадарда аваз пулдин пишкеш гуналди къейдна. Дербентдин 19-нумрадин СОШ-дин 10-классда кIелзавай Мегьамедова Зайнаба виридалайни гзаф — мумкин тир 42 балл къазанмишна. Адаз 5 агъзур манатдин кьадарда аваз алава пишкеш гана.
Рагнеда Рамалданова
