11-октярбдиз Махачкъалада, тарихдин «Россия — моя история» паркуна, международный дережада аваз ругуд лагьай сеферда «Лезги диктант» кьиле фида. ЦIи «Лезги диктант» чи халкьдин баркаллу руш Фируза Назимовна Керимовадин мергьяматлувилин «Иман» фондунин куьмекдалди «Лезги газетдин» редакцияди кьиле тухуда.
Диктантдин сергьятра аваз, са жерге мярекатар тешкилдайвал я: Етим Эминан уьмуьрдин ва яратмишунрин рекьиз талукьарнавай конкурс (гъалибчийриз пулдин пишкешар гуда); диктантдин иштиракчийрин арада багьа пишкешар къугъун (розыгрыш призов) ва масабур.
Диктант, дуьньядин гьи уьлкведа аваз хьайитIани, онлайн-къайдадани кхьиз жеда. Ам «Лезги газетдин» телеграм-каналда диктант авай юкъуз кьиле фида. Онлайн-къайдада кхьейбуру чпин кIвалахар диктант акьалтI хьайи 5 декьикьадин къене 8-989-653-42-35 нумрадин ватцапдиз, шикил яна, рахкурун лазим я.
«Лезги диктант» сятдин 2-даз (14:00) гатIунда. Чна вири ватанэгьлийриз аниз атуниз эвер гузва.
«Лезги газет»
