20-апрелдиз Мегьарамдхуьруьн райондин Кучун-Къазмайрал, Мегьамед Ярагъвидин тIварцIихъ галай спорткомплексда, дзюдодай Кубок патал жаванрин арада 2-турнир кьиле тухвана. Адан тешкилатчи мергьяматлувилин «Леки» фонд тир. Акъажунра 2009-2010 ва 2011-2012-йисара дидедиз хьанвай жаванри заланвилин са шумуд категориядай чпин устадвал къалурна. Ана Махачкъала, Къизилюрт, Буйнакск ва Дербент шегьеррай, Мегьарамдхуьруьн, СтIал Сулейманан, Агъул, Хив, Дербент районрай тир командайрик кваз 160-далай виниз спортсменри иштиракна. Турнирдин багьа мугьманрин арада Дагъустандин дзюдодин федерациядин вице-президент Гьажимурад Гьажиев ва гзаф масабур авай.
Къейдна кIанда хьи, вичин макьсад Кьиблепатан Дагъустанда дзюдо машгьурун ва вилик тухун, спортсменрин тежриба хкажун ва арада дуствилин алакъаяр мягькемарун, жаванар сагълам уьмуьр кечирмишунал желб авун тир спортдин и серенжем вини дережада аваз кьиле фена. «Леки» фондуни ам кьиле тухун патал куьмекар гунай Мегьарамдхуьруьн райондин администрациядиз, Дагъустандин дзюдодин федерациядиз, «Самур» СШОР-диз (Олимпиададин резервдин спортшколадиз), спонсорриз, Вирироссиядин категориядин судья Мубарис Амирметов кьиле аваз судьяйрин дестедиз, тренерриз, амадагриз, активистриз, волонтёрриз, гьакIни информациядин жигьетдай куьмек гунай ФЛНКА-диз ва «Лезги газетдиз» сагърай лагьана. Спортдин и серенжем гьар йисуз кьиле тухудай фикир ава.
Турнирдин иштиракчийрин арада республикадин, Вирироссиядин, международный акъажунрин гъалибчияр гзаф авай. Гьаниз килигна итижлудаказ ва къизгъиндаказ кьиле фейи бягьсерин нетижада 2011-2012-йисара дидедиз хьайибурун арада агъадихъ галай спортсменри 1-чкаяр кьуна: Абдулкъадир Абдулкъадиров (42 кг, Махачкъала, тренер — Абдурагьим Абдуллатифов), Арзуман Нежвединов (46 кг, Мегьарамдхуьр, тренер — Абдулла Букаров), Абдул Магьмудов (50 кг, Мегьарамдхуьр, тренер — Аким Пенжалиев), С. Мутуев (55 кг, Дербент, тренер — Р. Байрамов), Ислам Ширинов (60 кг, Мегьарамдхуьр, тренер — Рамиз Ширинов), Д. Тагьиров (66 кг, Махачкъала, тренер — Абдурагьим Абдуллатифов), Ренат Муртузалиев (73 кг, Мегьарамдхуьр, тренер — Абдулла Букаров), М. Абдуллаев (73 кг-дилай артух заланвал, Дербент, тренер — Р. Байрамов).
2009-2010-йисара дидедиз хьайибурун арада 1-чкайриз агъадихъ галай жаванар лайихлу хьана: Т. Абдулкъадиров (50 кг, Мегьарамдхуьр, тренер — Абдурагьим Абдуллатифов), Тагьир Халидов (55 кг, Мегьарамдхуьр, тренер — Тельман Халидов), Насим Агъасиев (60 кг, Мегьарамдхуьр, тренер — Къазимет Гьажиев), М. Яганов (66 кг, Махачкъала), М. Каралиев (73 кг, Махачкъала) ва О. Вагьабов (73 кг-дилай гзаф заланвал, Кьурагь).
Агалкьунар хьайибурув шад гьалара пулунин пишкешар, медалар, кубокар вахкунин мярекатда «Леки» фондунин векил Максим Садикьова (ада акъажунар тешкилуник, кьиле тухуник еке пай кутазва), жемиятдин деятель Руслан Мегьдиханова, ФЛНКА-дин президент Васиф Гьасанова, писатель Сардар Абила, жемиятдин деятель Садикь Гьасанова, «Лезги газетдин» кьилин редактордин заместитель Куругъли Ферзалиева, жемиятдин деятель Артем Ибилкьасумова ва теклифнавай хейлин мугьманри иштиракна.
Шегьеррай, районрай атанвай тренерри акъажунар вини дережада аваз кьиле тухунай тешкилатчийрин тIварцIихъ разивилин келимаяр лагьана.
Акъажунрин тешкилатчийри, спортдин мярекатар кьиле тухудайла, датIана куьмекар гузвай Кучун-Къазмайрал алай спорткомплексдин иеси Нежведин Исаеваз сагърай лагьана.
РикIел хкин, мергьяматлувилин «Леки» фонд халкьдихъ рикI кузвай са десте ксари арадал гъанва. Адан макьсад дарда авайбуруз куьмек гун, чи халкьдин милли культура хуьн ва вилик тухун, гьакIни яшайишдин, образованидин ва спортдин итижлу проектрин тереф хуьн, абур кьилиз акъудуник пай кутун, куьмекар гун я.
Рагнеда Рамалданова
