Киви

Шикилдай аквазвайди къуш я, амма адавай лув гуз жезвач. Алимри тестикьарнавайвал, кивидин ватан ЦIийи Зеландия я. Гьейран жедай кар ам я хьи, и къуш нек хъвадай гьайвандиз тешпигь я: ам чилел къекъвезва, цIакулар чIарариз ухшар я. Санлай кивийрин 5 жуьре аваз гьисабзава. Яргъи кIуфун куьмекдалди кивидивай чил 12 сантиметрдин дериндиз эгъуьниз жеда. Къати рангарин цIакулар авачтIани, кивийрихъ йигиндиз чукуриз жедай гужлу кIвачер ава.

Алай вахтунда киви ЦIийи Зеландиядин ярж яз гьисабзава, гьатта чкадин пулунизни халкьдин арада (официальный тIвар туштIани) «киви» лугьузва.

Итижлу делилрикай сад ам я хьи, кивияр уьмуьр яргъи къушар я: вагьший­рин гъиле гьат тавуртIа, тIебиатда абур 50-60 йисуз кьван яшамиш жезва. Кивийрин заланвал, чпин жуьрейризни­ еке-­гъвечIивилиз килигна, 1,4 килог­рамм­ди­лай 4 килограммдал кьван хьун мумкин я.

«Лезги газет»