Дагъустанда космосдин сад лагьай класс пайда жеда. Идакай информа­циядин «ТАСС Кавказ» центрада кьиле фейи пресс-конференциядал  Дагъустандин образованидин хел вилик тухунин  институтдин умуми образование еримлу авунин центра­дин пешекар Наида Агьмедовади хабар гана. Малум хьайивал, декабр­диз вичин бинедаллаз къведай йисуз космосдин класс ачухдай образованидин идара хкяда.

Космосдин сифтегьан классар гьакI Кабардино-Балкарияда  ва Кеферпатан Осетиядин Моздок шегьердани ачух­дайвал я. Кабардино-Балкарияда къведай йисуз цIийи жуьредин класс ачухуниз талукь рекьин картани туь­кӏуьрнава.

«Чна чи регионда космосдин класс ачухунин рекьин картани туькIуьрна­ва ва къведай йисуз и проектдик эке­чIиз кIанзава, – лагьана прес-кон­фе­ренциядал Нальчикдин аялрин яратмишунрин «Ракъинин шегьер» акаде­миядин алава образованидин му­ал­лим Эляна Науяниса. – Тарсарилай къерехдай тир кIвалахдин сергьятра аваз, чна астрономия, физика ахтармишиз башламишда, бязи маса тарсарни «мягькемарда». Аялри и хилериз гзаф итиж ийизва».

«Алемдин сад лагьай классар» Россиядин мулкунал гьеле 2020-йисарин сифте кьиляй пайда хьайи образованидин проектар я. Абур мектебра кIелзавай аялар гьеле гъвечIизамаз ракетринни алемдин хилен пешейрал желб авунихъ элкъуьрнава. Ихьтин сад лагьай класс 2022-йисан 1-декабр­диз Санкт-Петербургда ачухнай. Проектдин бинеда аялриз гележегдин пеше хкядалди  талукь образо­вание гун, идахъ галаз алакъалу яз дуьм-дуьз илимар (математика, физи­ка. информатика) дериндай чирун, гьакI­ни 3D-моделирование, робототехника, алемдин къурулушрин инженерия хьтин хилерай кьил акъудун ава.

Жасмина Саидова